Музейда – чорлар тарихы

2022 елда әлеге эстафетаны Рушат Солтанов кабул итте. Ул Татарстан Республикасының хәрби комисса­риаты тарихы турында яңа китап бүләк итте. Синара Яббарова һәм Рамил Фахразиев совет чоры китапла­ры бирде. Әлфия Галиева 1960нчы елларда Зәмфирә Хәсәншина чиккән сөлге һәм 1950нче елларда Фәния Нуриева эшләгән кровать кырые япмасын тапшыр­ды.

.Музей елдан-ел яңартыла. Этнография һәм көнкүреш залына кабат үзгәрешләр кертелде. Рус, керәшен, мари халыкларының көнкүрешен, тари­хын яктырткан экспозицияләр булдырылды. Әлеге уңайдан Ольга Тазова әнисе Варвара Григорьеваның (1902 елда туган) керәшен милли күлмәген, сарафа­нын, алъяпкычын, тәңкәле баш киемен, күкрәкчәсен, жилетын бирде.

.Тапшырган экспонатлары турында тулырак мәгълүмат бирүчеләргә аеруча рәхмәтлебез. Фле­ра Хәйруллина тирән эчтәлекле истәлекләре белән дә уртаклашты. Ул әбисе Әскапҗамал (1901 елда ту­ган) кигән күлмәк, аның кызы Мәрзия кигән күлмәк, бәйләнгән палас, оеклар, өстәл япмасы, һинд чәйләре тапшырды.

1926 елда хәзерге полиция бүлеге каршында мәктәп салырга карар кылганнар. Хәзерге лицей урыныннан Тимергали гаиләсенә йорт салу өчен җир бирмәкче булгач, Тимергали бабай: “Бигрәк авыл читендә бит”, – дип, каршы килә. Шулай итеп, аларга Бакча ура­мыннан йорт салу өчен план бирәләр. Бу истәлек 1926 елда Мөслим авылының чиге каян узганы һәм хәзерге көнгә күпмегә зурайганы хакында сөйли.

Тарих укытучысы Светлана Җәләева совет чоры мәктәп укучыларының эшчәнлеген чагылдыр­ган альбомнар тапшырды. Рәшит Абеев 1905 елгы әбисенең көнкүрештә кулланган коралларын: арба тәгәрмәчләре, ипи көрәге, печән күбәләгәндә кулла­на торган агач сәнәкләр, көянтә, керосин лампасы, табагачлар бүләк итте.

Шул рәвешле экспонатлар артканнан-арта. Аларны биргән кешеләрнең документлары нигезендә исәпкә алабыз һәм дәүләт каталогына, Камис системасына теркәп барабыз. Экспонатларның һәммәсе дә халык­ка күрсәтү өчен файдаланыла.

Йолдыз Зәкиева, туган як музее хезмәткәре.