Эшкә бирсәң чын күңел

“Зәйдә урта мәктәпне тәмамлагач, әниемнең туган авылы Иске Карамалыга күчеп кайттык. Мөслим аграр көллиятендә автомеханик һөнәрен үзләштердем һәм коммуналь хуҗалыкта слесарь булып эшли башладым”, – ди Айдар.

Эшен яратып, җанын биреп башкарса да, җир-ананың тургайлар җыры яңгыраган, мул уңыш бирүче басулары күңелен алгысыта. 2016 елда Айдар “Агромастер” җитештерү компаниясенә юл тота. Егетне эшкә көнендә үк кабул итәләр. “Агромастер” компаниясендә – слесарь, “Исламов” крестьян-фермер хуҗалыгында механизатор булып эшли Айдар. Язгы һәм көзге чәчү кебек мөһим кампанияләрне сагынып көтеп ала ул.

– Айдар быел Мөслим, Вәрәшбаш, Сөренчәк, Олы Чакмак басуларында – барлыгы 1500 гектарда эш башкарды. Җиденче сезонын эшләүче егет тырыш булуы, алдына куйган максатларга ирешә белүе белән аерылып тора. Айдар – басу-кырларга чын мәгънәсендә гашыйк кеше. Яратып, һөнәрен бар күңелен биреп эшләгәнгә хезмәте дә көйле бара. Бу сезонда ул үзебезнең компаниядә җыелган “Т-360Ш” тракторында эшләде. Айдар – компаниядә слесарь буларак та бик кирәкле кеше. Универсал! Бункерлар һәм чәчкечләрне җыя, слесарь-җыючы эшен аннан да остарак башкаручы юк, – ди “Агромастер” җитештерү компаниясе җитәкчесе урынбасары Фәрхәт Шәмсиев.

“Тайлер Диск-9000”чәчкече тагылган тракторда Айдар көненә 90 гектарда эш башкарган.

– Катнаш агрегат белән эшләү чәчүне кирәкле технологияләр нигезендә башкару мөмкинлеген бирә. Культивацияләү, чәчү һәм катоклау эшләрен башкаручы җайланма үзебезнең заводта җыела, – ди Айдар Галиев.

Айдарның җир эшенә мәхәббәте нәселдән килә. Бабасы Рәшит Шәфыйков та заманында мактаулы механизатор булган.

– Бабам мине гел үзе белән йөртте. Беренче тапкыр тракторга җиде яшемдә утырдым. Бабам шулвакыт: “Икмәкләр мул булып үссен өчен җирне яратырга кирәк, балам! Тәрбияне җир дә аңлый. Ил-көнгә кирәкле кеше булып үс! Йөземә кызыллык китермә!” – дигән иде. Механизатор һөнәренең авыр, шул ук вакытта мактаулы да булуын аңлаганмын. Шулай булмаса, бабам юлыннан китмәс идем, – ди Айдар, горурланып.

Лилия Шәймиева фотосы.