Фаҗига кабатланмасын!

Митингта район үзәгендәге мәктәпләрнең өлкән класс укучылары катнашты. Район Башкарма комитеты җитәкчесенең социаль-мәдәни мәсьәләләр буенча урынбасары Марина Бәдретдинова Бесланда булган фаҗига турында сөйләде. “Террорчыларның төп максаты – халык арасында курку тудыру, киләчәккә өметне сүндерү”, – диде ул.

Район башлыгы ярдәмчесе Наил Бәдретдинов шикле кешеләр белән аралашмаска, фиркаләргә иярмәскә, уяу булырга өндәде. Иҗтимагый совет рәисе Рушат Солтанов, яңа уку елы белән котлап, “Ил-көннәребез тыныч булсын! Илебезне алга алып баручы егет-кызлар булып үсегез”, – дип, укучыларга сәламәтлек теләде.

Митинг азагында өч көн буена суга тилмергән балаларны искә алып, чәчәкләргә учлап су сиптеләр.