Баланың иммунитетын ничек сакларга?

– Язилә Фәргатовна, иммунитет нәрсә ул?

– Иммунитет – организмның төрле авыруларга каршы тора алучанлыгы. Ул безнең организмның бөтенлеген саклауда зур роль уйный. Иммунитет бала ана карынында чакта ук формалаша. Ул нык булсын өчен, беренче чиратта, дөрес тукланырга, туйганчы йокларга, даими рәвештә физик күнегүләр ясарга, ешрак саф һавада йөрергә кирәк. Физик сәламәтлек кенә түгел, рухи сәламәтлек тә бик мөһим. Организмга нинди витаминнар, файдалы матдәләр җитмәвен дә ачыкларга кирәк. Иммунитет – организмны чит матдәләр, ягъни вирусладан, бактерияләрдән, гөмбәләрдән һәм башкалардан саклаучы система ул. Ул искергән күзәнәкләрнең юк ителүен дә контрольдә тота.

– Баланың иммунитетын ничек ныгытып була?

– Әти-әниләр балаларының сәламәт булуын, авырмавын тели. Авыруларга каршы тора алсын өчен, баланың иммунитеты нык булырга тиеш. Беренче чиратта чисталык турында онытмаска кирәк. Өйне чиста тоту, урамнан кергәч, кулларны юу мәҗбүри, ә сабый куллана торган тәлинкәләрне стерилизацияләү, имезлек һәм шешәләрне кайнатуның кирәге юк. Йорт хайваннары белән уйнау да рөхсәт ителә, иң мөһиме: соңыннан кулларны юарга онытмагыз!

– Кайбер әниләр балаларын мәҗбүри ашата. Моңа ничек карыйсыз?

– Артык күп ашау, бигрәк тә аппетитсыз ашатуга мин каршы. Галимнәр иң файдалы ризыкның да, теләмичә ашаганда, агуга әйләнүе турында әйтә. Бу вакытта ашказаны суы бүленеп чыкмый һәм ризык эшкәртелми.

– Язилә Фәргатовна, бала көн саен олы йомышын үтәргә тиешме?

– Әлбәттә! Баланың эче кату аның бөтен организмына, бигрәк тә иммунитетына зур зыян салырга мөмкин. Даруларны, бигрәк тә антибиотикларны бары тик табиб кушкан очракта гына эчәргә кирәк.

– Бала бүлмәсендә температура нинди булырга тиеш?

– Бала бүлмәсендәге идеаль температура – 18–20 градус, дымлылык – 45–60 процент булырга тиеш. Эссе бүлмә һәм тузан җыя торган әйберләр – иммунитет дошманнары.

Фото Язилә Габидуллинаның шәхси архивыннан