Әфган уты йөрәкләрдә әле һаман да

 Нияз Хәйбрахманов бу көнне яшьлегенә, тау-чокырлы Әфганстанга кайтып килгәндәй булгандыр. Нияз абый хезмәттәшләре белән очрашты, хатирәләрен барлады.

Әфган утын күргән ир-атлар

Урамда хәрби марш тавышы яңгырады. Машиналарына байраклар беркетелгән әфганчылар Яр Чаллы, Бөгелмә шәһәрләреннән, Чирмешән, Саба, Азнакай, Тукай районнарыннан килгән иде. Кайчандыр 19-20 яшьлек егетләр чәчләренә чал йөгергән ир-атларга әйләнгән. Ә күңелләрендә бүген дә Әфганстан республикасының тау-ташлы табигате, шулар арасында югалткан иптәшләре хакындагы истәлекләр яши.

– Бүген без хөрмәтле хезмәттәшебез Ниязның шатлыгын уртаклашырга килдек. Бәйрәм көн булса да, күңелдә моңсу хатирәләр уята торган истәлекле чара бу. Нияз белән без бер батальонда хезмәт иттек. Без барыбыз да – солдатлар: илебез кая кушса, шунда бардык, илебезнең тынычлыгын сакладык, – диде Нияз Хәйбрахмановның хезмәттәше – Чирмешән районыннан килгән Минзаһит Кәлимуллин.

– Нияз һәрвакыт сабыр, тыныч һәм ярдәмчел булды. Хәзер дә шулай: тыйнак һәм игелекле. Без Мөслимгә шатланып килдек. Үзең исән-сау булганда исемеңне тарихка кертү – зур хөрмәт һәм игътибар билгесе. Шундый дустыбыз булу белән ихлас күңелдән горурланабыз. Киләчәктә дә шулай дус булып, исән-сау яшәргә язсын. Күкләр һәрвакыт аяз булып, тыныч илдә яшәргә язсын! – диде Сабадан килгән кунак Мөнир Хөсәенов.

Тулырак “Авыл утлары” газетасының 2024 ел 6 сентябрь санында укыгыз.

Фәридә Гайнетдинова фотосы