Юлларда игътибарлырак булыйк

ДАИ хезмәткәрләре аварияләрнең сәбәбе шоферларның игътибарсызлыгында дип бәяли. “Юл хәрәкәте кагыйдәләренең 2.7 пункты нигезендә шоферга арыган хәлдә транспорт чарасы белән идарә итү тыела. Чөнки бу юл хәрәкәте иминлегенә куркыныч тудыра. Күп кенә шоферларны туктатканда аларның арыганлыгы йөзләренә чыккан була. Машина йөртүчеләргә физик арыганлык чиген узмаска, ял итү өчен вакытында туктарга, юлларда игътибарлы һәм сак булырга кирәк. Март аена кердек дип, күпләр машиналарына җәйге көпчәкләр дә куеп өлгергән. Бу бик куркыныч, кышкы көпчәкләрне алыштырырга иртә әле! Тотрыксыз һава торышы юлларда бозлавык тудыра. Узган атнада шундый бер шофер машинасы белән әздән генә зур һәлакәткә юлыкмый калды. Юлларда игътибарлырак булсагыз иде!” – дип хәбәр итә ДАИ җитәкчесе Айнур Хәйретдинов.