Йөкле хатын-кызның якыннарына Covid-19дан прививка ясарга киңәш ителә

Бала көткән хатын-кызны Covid-19 коронавирусы йоктырудан саклау өчен, аның гаиләсенә һәм якын тирәгә вакцинация ясарга кирәк. Бу хакта  ТР Сәламәтлек саклау министрлыгының баш акушер-гинекологы, 7нче Казан хастаханәсенең акушерлык һәм гинекология буенча баш табиб урынбасары Татьяна Шиһабетдинова хәбәр итте.
"Хатын-кыз көннәр буе өйдә генә утырса да, беркая да чыкмаса да, барыбер йоктыручылар гаилә әгъзалары була ала. Мин ата-ана булырга әзерләнүче республика халкын прививка ясарга чакырам", - дип ассызыклады спикер.
Йөкле һәм туендыручы хатын-кызларга прививка ясатырга ярамый.
ТР баш акушер-гинекологы мәгълүматларына караганда, Татарстанда ОРВИ белән — 275, ә коронавирус белән-22 авырлы кеше күзәтелә. Тугыз хатын-кыз хастаханәгә урнаштырылды.