Яз килде!

Язның бөтен рәхәтен урамда­гы кар суларыннан хасил бул­ган күлләвекләр боза. Халык зарлана-зарлана, су ерып, эшкә бара. Ярый ла машинада булсаң. Җәяүлеләргә бигрәк җайсыз бу көннәрдә. 
 

– Аяк асты йөрмәле түгел. Бу чорда өлкән яшьтәгеләр арасын­да бәхетсезлек очракларына юлы­гучылар арта. Яңгыр юлларда урыны белән бозлавык һәм “бола­мык” хасил итә. Юл өчен җаваплы хезмәткәрләр үз хезмәтләрен тиешенчә башкарсын иде! – ди Мәлләтамактан Гаяз Әхмәтҗанов. 
 

Мөслим урамнарында берничә көн дәвамында “Амкадор” трак­торлары эшли. “Төзекләндерү һәм яшелләндерү” унитар предприя­тиесе һәм “Мөслим инженерлык челтәрләре” җәмгыяте техникасы юллардагы җепшек карны эттереп түгә. Күпфатирлы йортлар ишегал­дында да эшли алар. 
Юллар ясаганда кар һәм яңгыр сулары агып төшәрдәй урыннар калдырылган булса, бу кадәр про­блема тумас та иде. Агар юлы бул­магач, ул су кая китсен инде?! Әлеге фикерне соңгы арада еш ишетәбез. 
 

– Яңгыр сулары өчен “водоот­водлар” булса да, алар кар сулары өчен көйләнмәгән. Шунлыктан кар сулары, кар кисәкләре тыгылып, бөкеләр барлыкка килде һәм су бик зур мәйданга җәелде. Җәй көне без бу проблеманы башка кабатланмас­лык итеп төзәтергә тырышачакбыз. Кайсы урыннарда торбалар куе­ласын хәл итәрбез. Быел кыш бик салкын килеп, җирдәге туң калын булу сәбәпле, кар сулары сеңеп бетә алмый. Бу да, үз чиратында, авыр­лыклар тудыра. Яшелләндерү үзәге эшчеләре бүген, кайда кул белән, кайда техника белән торба башла­рын, бортларны чистарталар. Шу­нысы куанычлы: җиренә җиткереп эшләнгән тротуарлар коры. 
 

– Күпфатирлы берничә йорт ишегалдында проблемалар калып килә. Авзалов урамындагы 1б, Ко­оператив урамындагы 168 йорт­лар ишегалларында йөрү җайсыз. Биредә яшәүчеләр машиналарын да парковкага куя алмый, дип беләбез, – ди Мөслим авыл җирлеге башкарма комитеты җитәкчесе Ру­нар Сәхбетдинов. 
“ М ө слим инже н е р ­лык челтәрләре” җәмгыяте эшчеләренең күпфатирлы йорт­лар ишегалларын күлләвекләрдән арындырудан тыш та эшләре күп. Канализация чокырларына да кар сулары тулган. Андагы суларны су­ырту да шактый вакыт таләп итә. Кооператив урамындагы 160нчы йортның подвалына да су кергән. 
 

– Подвалда су өч көн торды. Урта подъездда гына бу хәл. Был­тыр да шулай булган иде. “Юынтык суны кудыра торган мотор янып чыккач, качать итмәгән”, – дип әйттеләр. Моторны рәтләп киткәч, шөкер, проблема бетте, – ди әлеге йортта гомер итүче Илгизә Шаки­рова. 
 

Үзәк хастаханә парковкасы­на су җыелу турында да моң-зар ишетелде. “Бу мәсьәләне хастаханә үзе хәл итәргә бурычлы”, – ди авыл җирлеге җитәкчелеге. 
Яз быел җиһанга әнә шундый проблемалары белән аяк баса. Бу хәлләрнең вакытлыча булуы аңлашыла. Ләкин алар уңайлы мохиттә яшәргә күнеккән халык­ны чыгырыннан чыгара. Җирләр тизрәк кипшерсен, дип телик.

Лилия Шәймиева.

Автор фотосы.