Янгын турында кисәтү җайланмалары булу мәҗбүри

Ялгыз яшәүчеләр, дүрт һәм аннан да күберәк балалы гаиләләр, авыр тормыш хәлендәге гаиләләр, мөмкинлекләре чикләнгән райондашларыбызның йорт, фатирларына автоном янгын хәбәрчеләрен урнаштыру дәвам итә. Янгын куркынычсызлыгын саклау максатыннан Республикадан районыбызга барлыгы 2128 данә автоном янгын хәбәрчесе кайтты.
Бүгенге көндә автоном янгын хәбәрчесе (кыскартып әйткәндә аны АПИ дип атыйлар) кешеләрнең янгыннардан үлүен кисәтү буенча иң нәтиҗәле чараларның берсе булып тора. АПИга уттан яклау чаралары арасында өстенлек бирелә, чөнки төтен барлыкка килү стадиясендә үк реакция ясый ала һәм янгын куркынычы турында тавыш сигналы белән халыкны вакытында кисәтергә сәләтле. Хәбәрченең тавышы һәм ешлыгы шундый ки, ул хәтта нык йоклаган кешене дә уята.