Укытучылары белән данлы Мөслимебез!

Рус Шуган мәктәбе базасында узган семинар шулай дип аталган иде.

– 2019 елда да шундый чара­да катнаштык. Ул елны семинар “Район халыклары фольклоры, мәдәнияте һәм этнографиясе” исеме астында узды. Быел исә улым “Буыннарның педагогик чылбыры”исемле проект эшен яклады, – ди Мөслим лицее китапханәчесе Эльвира Сит­дыйкова.

Лицейның 6 сыйныфы укучысы Камил Ситдыйков “Буыннарның педагогик чыл­быры” проекты белән икенче урынга лаек булды. Камилнең теләге – информатика укыту­чысы булу. Камилнең әнисе – укытучы. Аларның буыннар чылбыры 224 ел тәшкил итә!

– Педагогик чылбырның беренче буыны әбиемнең әнисеннән башлана. Ул – не­мец теле укытучысы Рәмзия Фәттахова. Әбием Руфия Муси­на – лицей директоры, рус теле һәм әдәбияты укытучысы бул­ган. Әнием Эльвира – татар теле һәм әдәбияты укытучысы. Укы­тучылар династиясеннән булу­ым белән чиксез горурланам! – ди Камил.

Семинарда катнашучы­лар, ике төркемгә бүленеп, үз проектларын яклады. Район мәгариф идәрәсе белгечләре, укытучылар укучыларның чы­гышына гадел бәя бирде.

– Табиб ялгышса, бер кешенең гомере өзелә. Укы­тучы ялгышса, тулы бер буын юкка чыга. Мин – өченче буын укытучы. Бабам Афанасий Пе­трович, Самарада семинария тәмамлап, немец теле укы­та башлый. 1933 елгы ачлык сәбәпле, бабам гаиләсе белән Мөслимгә күченеп кайтыр­га мәҗбүр була. Рус Шуган мәктәбендә ике атна эшләгәч, аны Мөслим мәктәбенә чакыра­лар. Биредә ул 24 ел немец теле укыта, – дип искә алды Павел Устеряков.

Павел Петровичның әтисе дә, әнисе дә укытучылар була. Рус Шуган мәктәбендә эшләп, лаеклы ялга чыккан Устеряков­ларны районда белмәгән кеше сирәктер. Павел Устеряков Рус Шуган мәктәбендә – 39, бала­лар спорт мәктәбендә ике ел эшләгән.

Рус Шуган мәктәбе укы­тучылары һәм укучыла­ры белән данлы. 1882 елда тәүге мәртәбә ишекләрен ач­кан мәктәпкә 2022 елда 140 ел тула! Истәлекле дата уңаеннан үткәрелгән семинарда мәктәп тарихы, коллектив ирешкән җиңүләр турында да мәгълүмат җиткерелде.

– 2019 елда без грант оттык – Россия Федерациясе бюдже­тыннан 400 мең сум акча би­релде. Бу акчага Рус Шуган төп гомуми белем бирү мәктәбе территориясендә “Рус авы­лы ишегалды” музее эшләнде. Мәктәп ишегалдындагы бо­рынгы агач бина ремонтлан­ды: түбә һәм тәрәзә-ишекләр яңартылды, идәннәр алыш­тырылды. Музей өчен экспо­натларны бөтен авыл белән, бергәләп җыйдык. Бу музей­ны булдыруда авыл халкы зур көч куйды, – ди Петр Днепров исемендәге Рус Шуган төп гому­ми белем бирү мәктәбе дирек­торы Фирдәвес Фәрхетдинов.

Бүгенге көндә Рус Шуган төп мәктәбе территориясендә халыкка өч музей хезмәт күрсәтә. Аның берсе – мәктәп эчендәге музей, икенчесе – “Рус авылы ишегалды” музее һәм өченчесе– шулай ук грант сред­стволары хисабына булдырыл­ган “Авылның мәгариф музее” комплексы.

Семинарда катнашучы­лар мәктәпнең тарихы, биредә укыткан укытучы-остазларның хезмәт юлы турында кызык­сынып тыңлады. Фәнни- практик конференциядә кат­нашучылар Рус Шуган мәктәбе укучыларының җыр-биюләрен дә яратып тамаша кылды. Рус Шуган – халыкның 97 про­центы рус милләтеннән бул­ган авыл җирлеге. Кунаклар­га тәкъдим ителгән концерт номерларының рус телендә бу­луы – табигый хәл. Әмма мәктәп директоры конференциягә килүчеләргә үзгә бүләк әзерләгән булып чыкты. Фирдәвес Фәрхетдинов саф та­тарча “Кайтам әле авылыма” дигән җыр башкарды. Мәктәп директорының бар яклап та та­лантлы булуына шаккаттык.

Ф ә н н и - п р а к т и к конференциядә лицей һәм гим­назия, Олы Чакмак, Рус Шуган, Яңа Усы, Мари Бүләр, Сал.Му­хан, Баек мәктәбе укучылары актив булулары белән аерылып торды.

– Конференциядә “Минем әбием – беренче укытучым” исемле темага чыгыш ясадым. Беренче укытучы һәркемнең күңелендә кадерле кеше бу­лып саклана. Әбием Маргари­та Идиятуллина сыйныфы­на укырга баруым бүгенгедәй истә. Ул мине укырга-язарга гына түгел, тормыш серләренә дә өйрәтте. Акны карадан ае­рырга, гаделлекнең тормыш­та иң кирәкле сыйфат булу­ына төшендерде. Минеке ке­бек әбиләре булганнар – иң бәхетле кешеләр, – ди Мөслим гимназиясенең 9 сыйныф уку­чысы Сабина Идиятуллина.

Семинарда катнашучыларның һәммәсенә истәлекле бүләкләр тапшырыл­ды. Җиңүчеләр һәм лауреатлар район мәгариф бүлегенең һәм Рус Шуган мәктәбенең Мактау грамоталарына лаек булды.

Рус Шуган мәктәбендә гыйнвар аенда тагын бер зур чара көтелә. Мәктәпне төрле ел­ларда тәмамлаган егет-кызлар форумына бүгеннән үк әзерлек эшләре бара.

Лилия Шәймиева.

Лилия Шәймиева фотосы.