Мөслим-информ

Муслюмовский район

18+
2024 - Гаилә елы
Яңалыклар

Әтисе һөнәрен дәвам итә

Әтисе юлыннан киткән Кәрим Сәлимгәрәевнең уллары да энергетиклар династиясен дәвам итә

Кәрим Сәлимгәрәевне «энергетика короле» диләр. Өч дистә елдан ар­тык гомерен энергети­ка өлкәсенә багышлаган райондашыбызның шушы һөнәрне сайлавына әтисе сәбәп була.

– Әти Казандагы “Урта Идел авыл электр челтәрләре төзелеше” трестының Бөгелмәдәге төзү-монтаж идарәсендә участок началь­нигы булып эшли иде. Әтинең, саз ярып, басуларда багана­лар утыртып йөргәне хәтердә калган. Әни әйтмешли, ая­гыннан кирза һәм резин итек, өстеннән кожан төшмәгән. Без аның эшенең тынгы­сыз булуын кечкенәдән бе­леп, күреп үстек. Азнакай, Сарман, Мөслим районна­рында электр линияләрен төзү, эксплуатациягә тапшы­ру гына түгел бит әле! Ул ел­ларда яңгырдан соң калык­кан гөмбәләр кебек, бер-бер артлы сафка баскан хуҗалык объектларын электрга тоташ­тырып өлгер генә! – ди Кәрим Сәлимгәрәев.

Әтисенең эше мактау­лы икәнен күреп үсә Кәрим. Сәетгәрәй Сәлимгәрәев җитәкләгән участок дүрт ел рәттән алдынгы була. Бишен­че елны да мактаулы исем бирелә калганда, Сәетгәрәй абый Социалистик Хезмәт Герое исемен аласы булган. Әмма ул елны Мөслимдә аэ­ропорт төзелеше башлана һәм тәҗрибәле белгечне җаваплы объектка чакырып алалар.

– Кәрим кечкенәдән үк үҗәт һәм максатчан иде. Сүзен сүз итәргә, вәгъдә иткәнне башкарырга ярата иде. Мин аның бер мәртәбә дә каршы әйткәнен, тавыш күтәргәнен хәтерләмим, – дип искә ала Да­ния апа.

Кәрим Мәскәү энергети­ка институтының Казандагы филиалына дүрт имтиханның икесен тапшыру белән конкур­стан үтә.

– Бер ел студент тормы­шы сизелми дә үтеп китте. Беренче курстан соң армия хезмәтенә алдылар. Монда да мин дөрес һөнәр сайлавы­ма инандым. Хәрби хезмәтне Пермь өлкәсендәге хәрби-һава көчләре һәм һава һөҗүменә каршы оборона гаскәрләрендә үттем. Электромеханик-дизе­лист буларак, хәрби шартлар­да ике ел практик күнекмәләр алуым белем өстенә тәҗрибә туплау кебек тә булды, – ди Кәрим абый.

Хәрби хезмәттән соң Кәрим укуын дәвам итә. Институтта югары стипендия алып укучы улына сокланып туя алмый әти кеше. Сәетгәрәй абыйның авы­рып китеп якты дөнья белән хушлашуын бик авыр кичерә Кәрим абый.

– Әти сайлаган юлдан тай­пылмыйча баруымда, яхшы укуымда әтинең роле зур булу­ын аңлап үстем. Өченче курста укыган чак иде. Әти хәле начар булуын аңлагандыр, күрәсең, әнигә: “Дания, мин сезне таш­лап киткәч, авыр дип, Кәримне укуыннан туктата күрмә. Ихата тулы мал-туар, сыерны сатып булса да укытып бетер. Зама­налар үзгәрә, электрлаштыру елдан-ел көчәячәк. Бу тармак­ка әле белгечләр бик күп кирәк булачак”, – дигән. Ләкин әнигә сыерны сатарга туры килмәде. Тырышып укыдым, йөзенә кызыллык китермәдем, – ди Кәрим Сәлимгәрәев.

Институтны кызыл ди­пломга тәмамлаган яшь бел­геч хезмәт юлын Мөслим районының “Сельэнерго” оешмасында Вазыйх Хаҗиев кул астында мастер буларак башлый. Тормыш иптәше итеп күрше урамдагы иң чибәр кызны – Лилияне сай­лый. Күпмедер вакыттан соң Кәрим Сәлимгәрәевне Әлмәт районына эшкә чакыралар. Шәһәрнең “Агропромэнер­го” җәмгыятен җитәкли рай­ондашыбыз. Хезмәт чыны­гуы белән бергә җитәкчелек итү тәҗрибәсе дә ала Кәрим. 1994 елда ул “Әлмәт электр челтәрләре” җәмгыятенең Мөслим район бүлегенә ма­стер булып эшкә кайта. Ту­гыз ел хезмәт куйгач, Кәрим Сәлимгәрәевне инженер ва­зыйфасына билгелиләр.

– Электр линияләрен эксплуатацияләү, ремонтлау эшләре ул чорда да өзлексез алып барылды. Кәрим Мөслим һәм Үрәзмәт участокларын­дагы эш өчен җавап бирде. Элеккеге чорларда электр линияләрендә өзеклекләр бик еш була иде. Шуларны тиз арада төзәтү, тиз арада бри­гада төзеп, тиешле урынга җибәрү өчен намуслы хезмәт куйды Кәрим, – дип искә ала хезмәттәшләре.

Яхшы белгечнең тырыш хезмәтен, әлбәттә, күрәләр һәм югары бәялиләр. 2006 елның гыйнварында райондашыбыз “Әлмәт электр челтәрләре” җәмгыятенең Мөслим рай­он бүлеге җитәкчесе итеп билгеләнә. Бүгенгәчә әлеге вазыйфада ул. Кәрим Сәлимгәрәев кул астында бүген 44 кеше эшли.

– Безнең эш электр линияләренә хезмәт күрсәтүдән генә тормый, план­лы ремонт эшләре башкару, яңа линияләр сузу да – безнең өстә. Бу эшләр график нигезендә алып барыла. Оешмабыз яула­ган үрләр коллективның бер йодрыкка тупланып эшләвен күрсәтә. Без энергетика оеш­малары арасында уздырылу­чы бер генә бәйгедән дә читтә калмыйбыз. Алга таба да сы­натмасак иде! Энергетиклар тәүлек дәвамында кизү тора, чөнки җаваплы постта баш­кача була алмый, – ди Кәрим Сәлимгәрәев.

Кәрим абыйның уллары да энергетиклар династиясен дәвам итә. Камил әтисе белем алган Казан энергетика уни­верситетында бакалавриат­ны кызыл дипломга тәмамлап, укуын магистратурада дәвам итте. Бүген ул үз эшен алып бара, Казанда яши. Нурислам да энергетик булырга хыял­лана. Егет абыйсы кебек ин­ститутны кызыл дипломга тәмамлап, икенче елын бака­лавриатта укый.

– Улларыбыз әтиләре, баба­лары юлыннан китте, династия дәвам итә. Оныклар да энер­гетиклар булмас дип кем әйтә ала?! Кәрим максатчан, төпле фикерле һәм гаилә җанлы бу­луы белән аерылып тора. Шун­дый ул тәрбияләгәннәре өчен мин әнкәй белән әткәйгә чик­сез рәхмәтлемен, – ди тормыш иптәше Лилия апа.

Кәрим Сәлимгәрәев шушы көннәрдә 55 яшьлек юби­леен билгеләп үтә. Гомер бәйрәмегез котлы булсын! Гаилә иминлеге, эшегездә та­гын да зуррак уңышлар, яңа биеклекләр алуыгызны тели­без.

Лилия Шәймиева.

Фото – К.Сәлимгәрәевнең шәхси архивыннан.

 

Следите за самым важным и интересным в Telegram-каналеТатмедиа

Безнең телеграм каналга кушылыгыз! Телеграм-канал

Без "Дзен"да! Дзен


Оставляйте реакции

1

0

0

0

0

К сожалению, реакцию можно поставить не более одного раза :(
Мы работаем над улучшением нашего сервиса

Нет комментариев

Реклама