Тарихи юл үткән мәктәпнең юбилей елы.ФОТОРЕПОРТАЖ

Рус. Шуганда беренче чиркәү-приход мәктәбенә 1882 елда нигез салына. 1912 елда мәктәп бинасы төзелә һәм дүрт сыйныфлы зем­ский мәктәп ачыла. 1936 ел­дан ул урта мәктәп статусын ала.

Мәктәп юбилеена килгән кунакларны иң элек укучылар сәламләде. Юбилейга мәктәпне төрле елларда тәмамлаган егет- кызлар да кайткан иде. Алар арасында фән кандидатла­ры, табиблар, укытучылар бар. Символик торттагы шәмнәрнең күпчелеген мәктәпне төрле ел­ларда тәмамлаган чыгарылыш сыйныф укучылары кабызды.

– Рус.Шуган гомуми бе­лем бирү мәктәбендә 1988 елда эшли башладым. 1995 елда мәктәп директо­ры итеп билгеләделәр, – ди мәктәп директоры Фирдәвес Фәрхетдинов. – 2006нчы елның 11 сентябрен иң бәхетле көнем дип саныйм. Бу көнне Мөслим районының ул вакыттагы баш­лыгы Ришат Хәбипов белән ре­монтланган мәктәп бинасының беренче өлешен ачтык.

Фирдәвес Фәрхетдинов ди­ректор булып эшли башла­ган беренче елларыннан ук мәктәпне танытасы килүен билгеләп үтте. Волейболны үстерү, яшелчәчелек белән шөгыльләнү, мәктәпнең сайтын булдыру – барысы да шул мак­саттан эшләнә. Соңгы еллар­да Рус.Шуган мәктәбе туган як тарихын өйрәнү юнәлешендә эшли. Президент грантлары хи­сабына ике музей ясаганнар. “Территориясендә өч музей (!) эшләүче мәктәп Татарстанда түгел, Россиядә дә юктыр”, – ди Фирдәвес Фәрхетдинов. Уен ко­раллары сатып алып, балалар­ны гитарада, синтезаторда уй­нарга өйрәтә башлаганнар. Ма­тематика кабинеты өчен инте­рактив панель сатып алганнар. Мәктәп директоры “Авылның мәгариф тарихы музее” проек­тын тормышка ашыруда ярдәм итүчеләргә – Рус. Шуган авыл җирлеге башлыгы Альбина Ба­сорина, шәхси эшмәкәр Илдар Кәримов, прораб Владислав Но­виков, Рус.Шуган мәктәбенең технология укытучысы Алек­сандр Борисов һәм “ТАТМЕ­ДИА” АҖ филиалы “Мөслим- информ” коллективына Рәхмәт хатларын тапшырды.

Район җитәкчелеге та­рафыннан да бүләкләр әзерләнгән иде. Яшь буынга белем һәм тәрбия бирүдә озак еллар фидакарь хезмәте өчен һәм Рус.Шуган мәктәбенең 140 еллык юбилее уңаеннан башлангыч сыйныфлар укы­тучысы Ускова Татьяна Ни­колаевна, математика укы­тучысы Әгъләмова Әлфия Әнвәр кызы һәм рус теле һәм әдәбияты укытучысы Котко­ва Марина Евгеньевна – район башлыгының Мактау грамо­талары, технология укытучы­сы Борисов Александр Анато­льевич һәм техник хезмәткәр Петрова Сирена Галимҗан кызы Рәхмәт хатлары белән бүләкләнде. Мәктәп коллекти­вы район мәгариф идарәсенең, җирлек башлыгының да кот­лауларын кабул итте.

– Рус. Шуган мәктәбендә мин ике ел Сал.Муханнан йөреп укыдым. Әмма ул ике ел үзенчәлекле, үзгә бул­ды – мине монда тормыш­ка әзерләделәр. Рус.Шуган­да укыган елларда өч фәннән район бәйгесендә җиңү яула­дым. Сезне ныклы белем бирү базасы булган мәктәптә иң яхшы укытучылар укыта! – диде Ривал Нуриев, балалар­га мөрәҗәгать итеп.

Юбилей тантанасы Рус. Шуган авылы һәм район үзешчәннәре әзерләгән кон­церт номерлары белән үрелеп барды.

Римма Афзалова.

АЛЕКСАНДР НОВИКОВ ФОТОСЫ.