Сентябрьдә чәчәк түтәлләре

Суганчалы үсемлекләр утырту

Сентябрь язын һәм җәйнең беренче яртысын­да чәчәк ата торган суганчалы үсемлекләр утырту өчен яхшы чор. Алар өчен алдан ук кояшлы урын­да түтәлләр әзерләгез. Аның туфрагы яхшылап йомшартылган һәм ашламалар кертелгән булыр­га тиеш. Шуннан соң суганчаларны утыртыгыз. Шуны исегездә тотыгыз: суганчалы үсемлекләрнең үсеп җәелеп китә торган гадәте бар. Шуңа күрә һәркайсына запас урын калдырыгыз.

Күпьеллык чәчәкләрне бүлү һәм күчереп утырту

Сентябрьнең беренче яртысында күпьеллык чәчәкләрне ишәйтү белән шөгыльләнегез. Моның өчен берничә ел үскән куакны җирдән казып алы­гыз һәм тамыр-сабакларын, яңадан үсеп китә тор­ган бөре һәр кисәктә калырлык итеп, өлешләргә бүлегез һәм яңа урынга утыртыгыз. Беренче елны алар чәчәк атмаска да мөмкин һәм чәчәк түтәлен шуны исәпкә алып планлаштырыгыз.

Берьеллык чәчәкләрнең орлыкларын җыю

Кашкарый, космея, циния, бәрхет гөл һәм сен­тябрь аенда бакчаны бизәп торган башка берьел­лык чәчәкләрнең орлыкларын җыярга һәм са­кларга кирәк. Бу язын акчагызны янга калдырыр­га мөмкинлек бирәчәк. Иң мөһиме, орлыкларны җыеп кына калмыйча, яхшылап киптерергә, кәгазь пакетларга салырга, кайсында нинди чәчәк сакла­нуын язарга һәм язга кадәр югалтмаска кирәк.

Чәчәк түтәлләрен чистарту һәм мүлчәләү

Салкын һәм яңгырлы көннәр башланыр ал­дыннан чәчәк түтәлләрен тагын бер тапкыр утарга кирәк. Саргайган һәм кипкән күпьеллык чәчәкләрне кисегез, декоративларын исә тагын берникадәр вакытка калдырыгыз. Чәчәк түтәлендәге туфрак­ка 5-8 сантиметр калынлыгында мүлчә җәегез. Бу чәчәкләрне салкыннар һәм корткычлардан са­клаячак.

Көзге ашламалар кертү

Башка үсемлекләр кебек үк, көзен күпьеллык чәчәкләр дә калий, фосфор һәм магнийга мохтаҗ. Чәчәк түтәлен тукландыру өчен ашламаларны ике тапкыр – сентябрь һәм октябрь башында кертергә кирәк. 10 литр суга 25 грамм суперфосфат, 1,5 аш кашыгы калимагнезия һәм 2,5 грамм бор кисло­тасы кушып ясалган эремә яхшы вариант булачак.

Суганча бүлбеләрен казып алу һәм саклау

Канна, дәлия, гладиолус, карабодай гөле һәм безнең киңлекләрдә кышламый торган башка суган­чалы үсемлекләрне, чәчәк атып бетергәч һәм яфра­клары корыганнан соң, казып алырга кирәк. Моны коры көнне эшләү зарур. Суганча һәм бүлбеләрне шунда ук сортларга аералар, марганцовка белән авыруларга каршы эшкәртәләр, базга яки суыткыч­ка саклауга куялар.

Лианаларны кисү

Бүген һәр участокта диярлек клематис, капри­фоль зелпесе һ.б. үрмәле үсемлекләрне очратырга мөмкин. Көзен аларны төрләренә карап кисәргә яки терәкләрдән алып капларга кирәк. Терәкләрдә кыш чыга торган талымсыз лианалар да бар, әлбәттә. Әмма алар әллә ни күп түгел.