Район ягу сезонына әзер

– Һәр оешманың ягу сезоны­на әзерлеге турында паспортлар төзелә. Бүгенге көндә Мөслимдәге барлык социаль объектларны ике котельный җылыта. Район мәгариф идарәсе, яшьләр белән эшләү һәм спорт бүлеге, мәдәният бүлеге кышкы ягу сезонына әзер булуын белдерделәр, – ди район Башкарма комитетының инфраструктур үсеш бүлеге җитәкчесе урынбасары Ил­нар Сәйфиев.

Җиденче һәм тугызынчы санлы ко­тельныйлар 34 мәгариф объектын, 14 сәламәтлек саклау учреждениесен, 31 мәдәният объектын, 6 спорт, 2 социаль яклау, хезмәт һәм мәшгульлек үзәге ур­нашкан биналарны җылылык белән тәэмин итә.

Мөслим һәм Сарман районнары бу­енча янгын күзәтчелеге бүлегеннән хәбәр итүләренчә, августның берен­че көннәреннән “Кышка әзерлек” профилактик операциясе башлан­ган. Аның кысаларында мәктәпләр, балалар бакчалары, авыллардагы мәдәният йортларының, клубларның газ котеллары тикшерелгән. Тикшерү барышында берничә объектта газ котелларының төзек булмавы ачы­кланган. Булган кимчелекләр са­наулы көннәрдә төзәтелгән. Өлкәннәр, социаль яклау бүлегендә исәптә торучы гаиләләр, караучы­сыз калган райондашларыбызның хуҗалыкларындагы электр җиһазларының төзеклеге катгый контрольгә алынган.

– Кышка әзерлек – бик четере­кле, катлаулы эш. Аны бер көндә генә башкарып чыгып булмый. Си­стемалы төстә, даими эшләгәндә генә кышны проблемаларсыз чыгар­га була. Техник яктан барлык оешма- предприятиеләрнең котельныйла­ры әзерлек сызыгында тора. Алдагы атнада җылылык белән тәэмин итү челтәрләренә тикшерү үткәреләчәк. Быел Укытучылар йорты янында бар­лыгы 30 метр арада җылылык торба­ларын да алыштырдык, – ди “Мөслим инженерлык челтәрләре” җәмгыяте җитәкчесе Ирек Заһидуллин.

Мөслимдә 60 күпфатирлы йорт исәпләнә. Аларның барысында да икеконтурлы котеллар урнаштырыл­ган, индивидуаль җылыту система­лары көйләнгән. Йортлардагы төтен юллары, вентиляция каналлары ел дәвамында планлы төстә тикшерелеп тора.

– Фатирыңда индивидуаль җылылык системасы булу – зур сөенеч ул. Мин беренче катта яшәгәч, җылылыкны, гадәттә, сентябрь ба­шыннан ук кушам. Быел ничек булыр. Кызларым Казанда яши. Җылылык биргәнне көтә-көтә үзләре дә чирләп бетә, балалары да борын тартып йөри башлый. Мөслимдә дә балалар бакча­ларында, мәктәпләрдә, хастаханәдә, башка бюджет оешмаларында ел саен җылылык биргәнне түземсезлек белән көтеп алалар. Сабыйларга җылы бигрәк тә кирәк. Көннәр суыту белән җылылык бирсеннәр иде! – ди район­дашыбыз Гөлсинә Сәгыйдуллина.

– Безнең котельныйлар 41 оеш­ма-предприятиене җылылык белән тәэмин итә. Ягу сезонына әзерлекне ел саен ягу сезоны тәмамлану белән башлыйбыз. Биналарның җылылык челтәре юдырылды, опрессовка ясалды, өзеклек килеп чыгу куркы­нычы булган урыннар ачыкланып, кимчелекләр вакытында төзәтелде. Җылылык челтәреннән имин файда­лану өчен җаваплы кешеләрне укыт­тык. Хезмәткәрләребез дә, авария бри­гадалары да ягу сезонына әзер, – ди җитәкче Ирек Заһидуллин.

Район мәгариф идарәсе җитәкчесе урынбасары Расыйл Фәттахов хәбәр итүенчә, мәктәпләр ягу сезонына әзер. Түбән Табын гомуми белем бирү мәктәбендә яңа котел урнаштырыл­ган, учет узелы яңага алыштырыл­ган, яңа төтен юлы куелган. Тат. Шу­ран мәктәбендә капиталь ремонт үткәрелгән. Бинаның түбәсе алыш­тырылган, яңа пластик тәрәзәләр ку­елган, мәктәпнең үзәк керү өлеше эшләнгән, тышкы ишекләр алмашты­рылган. Мәктәпнең аш-су блогында да ремонт эшләре башкарылып, өр-яңа җиһазлар алынган.

– Кышкы ягу сезонына мәктәпләрнең әзерлеге аеруча мөһим. Укучыларның иминлеге, сәламәтлеге мөһим. Мәктәп котельныйларында­гы сигнализаторларга, төтен юлла­рына тикшерү үткәрелде. Оператор­лар Әлмәт шәһәрендә газ җиһазларын имин эксплуатацияләү буенча укулар­да булып, белемнәрен күтәрү турын­да таныклыклар – техник минимум­нар алып кайтты, – дип хәбәр итә Ра­сыйл Фәттахов.

Газ җиһазларын, җылылык мичләрен, төтен һәм вентиляция каналларын эксплуатацияләү ал­дыннан шәхси йорт хуҗалары да төтен юлларының, вентиляция каналларының чисталыгын кайгыр­тырга онытмасыннар иде!

Лилия Шәймиева.