Мөслимдә – Лэнд-арт фестивале үтә

– Табигатькә сакчыл карашны про­пагандалау, лэнд-арт юнәлешендә яңа исемнәр эзләү һәм аларга ярдәм итү, Мөслим районына күбрәк туристлар­ны җәлеп итү максатыннан үткәрелүче бу чарада Россия шәһәрләреннән һәм Испаниядән кунаклар көтәбез. Быел фестивальдә барлыгы 36 кеше үзләренең осталыкларын күрсәтәчәк, – ди чараны оештыручы массакүләм спорт һәм мәдәни чаралар дирекциясе җитәкчесе Марат Бәйрханов.

Фестиваль Мөслимдә 13-19 июнь көннәрендә барачак. Чараны тантана­лы ачу 13 июньгә планлаштырылган. Бүгенге көндә “Кояшлы Ык” ял зона­сында узган фестивальдә ясалган арт- объектларны матурлау, реставрацияләү эшләре бара. Фестиваль барышында та­бигый материаллардан тагын 18 архи­тектура объекты ясалачак. Алар төрле формада булачак.

– Конкурста командалар кат­наша. Командада ике кеше булыр­га мөмкин. Бәйгедә мәдәният һәм мәгариф учреждениеләре коллектив­лары, үзешчән осталар, гаиләләр, шу­лай ук рәссамнар, дизайнерлар, иҗади һөнәр ияләре, гомумән, теләге бул­ган һәркем катнаша ала. Фестиваль эшләрен әзерләгәндә табигый мате­риаллар куллану төп шарт булып тора. Экспонатларны ботаклардан, ташлар­дан, үләннәрдән, чүп-чардан, коры яфраклардан ясарга була, – ди Марат Бәйрханов.

Фестивальдә катнашучы рәссам һәм дизайнерлар өчен арт-объектлар ясар­га тимердән эшләнмәләр, тал ботаклары әзерләнгән. Иҗат эшләренең биеклеге өч метрдан да ким булырга тиеш түгел, ди чараны оештыручылар.

Мө с лимг ә к и ләчәк яшь дизайнерларның, шактый күп бәйгеләрдә катнашып, зур тәҗрибә ту­плаулары билгеле. Аларның хыялы бы­елгы фестивальдә нәрсә тудырыр икән, дип көтә район халкы.

Мөслим төрле дәрәҗәдәге чаралар үткәрү мәйданчыгына әверелеп килә. Элек Татарстанның берәр шәһәреннән килсәләр дә, сөенә идек. Хәзер Мөслимгә Россия шәһәрләреннән генә түгел, хәтта чит илләрдән дә кунаклар килә. Ык буендагы матур үзгәрешләр җанга рәхәтлек бирә. Табигатьтә тудырылган сәнгать әсәрләре – гөмбәләр, күбәләкләр янында ике ел инде фотога төшәләр. Дизайнерлар тудырган үзенчәлекле әсәрләр, җирлегебезгә бүләк булып, әле бик күп еллар яр буйларын бизәр!

Лилия Шәймиева.

Автор фотосы.