Мөслимдә җил чәчәге белән чирләүчеләр күбәйгән

Районда ел башыннан җил чәчәге (ветрянка) белән балалар бакчаларында 26 бала чирләгән. Авыручыларның күбесе "Күбәләк" балалар бакчасында теркәлгән. Узган елның декабрендә генә дә 33 баланың җил чәчәге белән чирләгәне мәгълүм. Район педиатры Резеда Мөҗипова хәбәр итүенчә, быел бу чирдән вакцина кайтарылмый. Ә узган ел вакцина ясарга мөмкинлек булып та, күп ата-аналар балаларына прививка ясатудан баш тарткан."Җил чәчәге белән авыручы балалар ун көн дәвамында өй шартларында дәвалана, бакчага исә педиатр рөхсәте белән генә бара ала", - ди Резеда Әнәсовна.