Мөслим сәнгать мәктәбендә ачык дәрес үткәрделәр

Мөслим сәнгать мәктәбенең җыр сәнгате бүлеге укытучысы Гөлназ Йосыпова 2 класс укучысы Зөләйха Хантимерова белән "Артикуляция һәм дикция" дигән темага ачык дәрес үткәрде. Дәрес вокал күнегүләр белән башланды, төрле кызыклы танып-белү мәгүлүматлары, иллюстрацияле материаллар кулланылды. "Дәрескә төрле планда репертуар сайланып, укучы белән укытучы арасында иҗади хезмәттәшлек атмосферасына корылган әлеге дәрес югары дәрәҗәдә үтте. Һәр моментта укытучының куйган максатына ирешү өчен укучысына ярдәм итүе һәм үз эшенең остасы икәнлеге күренеп тора", - дип хәбәр итәләр безгә сәнгать мәктәбеннән.