Мәлләтамакта – Сабантуйда

Сабантуйларны язгы кыр эшләре төгәлләнгәч үткәргәннәр. Бәйрәмнең исеме дә – сабан туе, сабан бәйрәм итә, димәк.

– Сабантуй – авыл хуҗалыгы хезмәтчәннәренең олы бәйрәме инде ул. Бәйрәмнең иң матур мизгелләре дә – авыл хезмәтчәннәрен, кыр батыр­ларын хөрмәтләү! Ике улым авыл хуҗалыгында эшли, икесе дә – алдынгылар, – ди Кузьма Үтәгәнов, горурланып.

“Чаллы икмәге” АҖ ге­нераль директоры Рафаэль Юнысов та, авылдашларын тәбрикләгәндә, шушы фикер­не җиткерде:

– Сабантуй – буыннан-бу­ынга күчә торган, иң матур, иң көтеп алган, халыкны берләштерүче бәйрәм. Язгы кыр эшләрен тәмамлаганнан соң, халыкны җыеп, хезмәт батырларына рәхмәт җиткерә торган бәйрәм бу. Алла­га шөкер, “Туган як” агро­фирмасы хезмәтчәннәре язгы кыр эшләрен вакытын­да башкарып чыкты. Мин хезмәтчәннәребезнең бары­сына да бик рәхмәтлемен. Дөрес, быел табигать безне сыный: яңгырлар юк. Шу­лай да халкыбызның күңеле бәйрәмчә шат, көр.

Мәлләтамак Сабантуен­да иң элек авыл хуҗалыгы хезмәтчәннәре хөрмәтләнде. Егет-кызларга инвестор – “Чаллы икмәге” АҖ гене­раль директоры Рафаэль Юнысовның Рәхмәт хатла­ры тапшырылды. “Туган як” агрофирмасының кыр ба­тыры Илнар Сөләйманов, иңнәренә тәкә салып, мәйданны урады.

Сабантуй халкыбызның милли уеннары белән үрелеп барды. Уеннарга балалар арасында оештырылучы күз бәйләп бүләк кисү старт бирде. Уенда катнашу өчен мизгел эчендә чират бар­лыкка килде. Элек-электән Сабантуйның төп бизәге булган авыш баганага менү, чүлмәк вату, капчык сугышы һәм башка уеннар тәкъдим ителде. Шул ук вакытта гер күтәрү, кул көрәше, йөгерү ке­бек спорт ярышлары да игъ­тибардан читтә калмады. Ха­лык кына, ни сәбәпледер, ак­тивлык күрсәтмәде, бәйрәмне читтән генә күзәтте. (Дөрес, татарча бию көенә хәйран гына активлашып алды мәлләтамаклылар.) Уен- бәйгеләрдә нигездә балалар катнашты. Соңгы елларда по­пулярлык казанган әтәч куу уенына да балалар чыкты. Тик әтәч әллә әлсерәгән (алай дисәң, көне дә эссе түгел иде), әллә язмышына буйсын­ган – урыныннан селкенүне кирәк тапмады. Шул сәбәпле мәйданга үзен икенче тап­кыр җибәргәннән соң да тиз “капты”!

– Татарның иң кадерле, иң матур бәйрәме ул – Сабантуй! Сабантуйны көтеп алам. Бала­ларны, кешеләрне яратам! Ел саен шунда балалар уйнатыр­га төшәм, – ди уеннар оешты­руда ярдәм иткән 83 яшьлек Мисбах Мифтахов.

– Җәлилдә дә Сабантуй үтә, шулай да Мәлләтамак Сабантуена килдек әле. Мәлләтамакта туганнары­быз яши. Сабантуй бит ул – ту­ганнар, дуслар белән күрешү мөмкинлеге, – ди Мөнзилә На­сыйрова.

Мөнзилә апа сер бирмәсә дә, әйтергә кирәк: аның улы Ринат Насыйров җырчы Марат Фәйрушин белән бәйрәмне ямьләде. Сабан­туйда дәртле көйләр, моңлы җырлар һич тынып тормады.

Сабантуйга күпчелек ат ча­бышларын һәм татарча көрәш карарга килә. Тик соңгы ел­ларда авыл сабантуйларын­да ат чабышлары үткәрелми. Авылларда атлар калмады. Ә көрәшкә чыгучылар бар әле, Аллага шөкер. Мәлләтамак Са­бантуенда көрәш батырлары­на әзерләгән тәкәләр дә икәү булып чыкты. Аларның бер­се – яшүсмерләр көрәшендә җиңү яулаган Мәлләтамак оныгы Ислам Гәрәевка, икен­чесе Сабантуйның абсолют батыры – чыгышы белән На­рат Астыннан булган Илнар Гайнетдиновка тапшырылды. Балалар көрәшендә Ташлы­яр егете Ринат Мөхәммәтов җиңүче булды.

Римма Афзалова.