Ләйсәннән – итле коймак
Коймак үзе дә тәмле. Коймак-беленнәрне бал белән, төрле җиләк- җимешләр, варенье белән ашарга яраталар. Итле коймак аеруча тәмле. Мөслимдә яшәүче Ләйсән Андреевадан итле коймак рецептын тәкъдим итәбез.
Кирәкле ингредиентлар: камыр өчен бер стакан кефир, бер йомырка, бер чәй калагы тоз, бер чәй калагы шикәр комы, он, ярты стакан кайнар су, чәй калагы очында чәй содасы, бер аш калагы сыек май.
Эчлек өчен тавык яисә сыер итеннән фарш, 2-3 баш суган, артык күп булмаган күләмдә кәбестә кирәк булачак. Кайберәүләр кәбестә урынына дөге дә сала. Фаршны, суганны, кәбестәне бергә салып, тәменчә тоз һәм борыч кушып, томалап пешерәбез.
Әзерләү тәртибе: кефир, йомырка, тоз, шикәр комын, онны яхшылап болгатабыз. Бер стаканда яңа кайнап чыккан суга соданы салып болгатабыз һәм камырга салып туглыйбыз.
Азактан сыек майны салып болгатабыз һәм камырны 5 минут чамасы ял иттерәбез. Коймакларны кызган табада ике ягын да пешереп алабыз. Пешкән коймакка эчлекне салып, рулет формасында төрәбез. Табынга кайнар килеш тә, салкын килеш тә бирергә була.
Тәмле булсын!
Рубриканы Лилия Шәймиева алып бара.
Следите за самым важным и интересным в Telegram-каналеТатмедиа
Безнең телеграм каналга кушылыгыз! Телеграм-канал
Нет комментариев