Җирлек башлыклары хисап тота

Рус Шуган авыл җирлегендә 232 хуҗалыкта 300дән артык эре тер­лек асрыйлар. 4 фермер хуҗалыгы, 18 үзмәшгуль бар. Үзмәшгульләр төзелеш-ремонт, тегү эшләрен баш­кара, чәчтараш хезмәтен күрсәтә. Юлларны ремонт­лау, кардан чистарту, үлән чабу да аларга йөкләнгән.

Узган ел үзара салым хиса­бына юлларга гравий җәелгән. Рус. Шуганда һәм Смыловка якларында юлларны тигезләү, кышын кардан чистарту да үзара салым ярдәме белән башкарылган. Җирлектә 16 яктырткыч алыштырылган. Экстрим-парк ясалган һәм аңа 400 метр озынлыгында койма коелган. Балалар мәйданчыгы да куйганнар. Быел үзара са­лым хисабына күпер ремонт­лау планлаштырыла. Юлларны төзекләндерү, кышын кардан чистарту, урам утларын алыш­тыру да үзара салым хисабы­на башкарыла. Әлеге эшләрне башкарып чыгу өчен үзара са­лымны җирлектә яшәүче һәр кешедән 1 мең сум күләмендә җыярга булганнар.

Рус. Шуган төп белем бирү мәктәбендә җиде класс-комплектта 35 укучы белем ала. Мәктәпкәчә төркемгә биш бала йөри. Узган ел үзара салымның 70 меңен мәктәп ихтыяҗлары өчен тотканнар (мәктәп ише­галдына утлар куелган). Рус. Шуган мәктәбе Россия прези­денты грантларында актив кат­наша. Грант хисабына мәктәп авылда өч музей ачты.

Җирлектә дүрт авылга ике ФАП, мәдәният йорты, китапханә, чиркәү эшли.

– Раштуа, Качману, Пас­ха кебек бәйрәмнәргә күрше авыллардан да килүчеләр күп, – ди Рус.Шуган авыл җирлеге башлыгы Альбина Басорина. – Район күләмендә узучы мәдәни чаралар да күп. Узган ел Тро­ицада Шуганның 300 еллык юбилеен да билгеләп үттек.

Узган ел авылның “Че­ремушки” ансамбле, “Кара­вон” Бөтенроссия рус халык җырлары фестивалендә кат­нашып, сәхнә костюмнары тектерү өчен 400 мең сумлык сертификатка ия булган. Алай гына да түгел, Рус. Шуган авыл җирлеге “Иң яхшы муници­паль практика” Бөтенроссия бәйгесенең “Муниципаль берәмлекләрдә яшәүчеләр белән нәтиҗәле элемтә тәэмин итү” номинациясендә икенче ел рәттән беренче урынны ала!

Иң борчыганы – халык саны кими. Соңгы биш елда җирлектә 52 кеше вафат бул­ган, 13 бала туган. 27 кеше җирлектән күчеп киткән.

Олы Чакмак авыл җирлегендә дә шул ук хәл. Биш елда халык саны 45 кешегә кимегән (36 кеше ва­фат булган). 19 бала дөньяга тәүге авазын салган, аларның да күпчелеге җирлектә яшәми (теркәлү урыны буенча – Олы Чакмак). 144 хуҗалыкта 445 кеше гомер кичерә. Авыл рай­он үзәгенә якын урнашкан. Шул сәбәпле “район үзәгенә йөреп эшләүчеләр, шуның хисабына авылда калучылар бар әле”, – ди Олы Чакмак авыл җирлеге башлыгы Илнур Габи­дуллин.

Олы Чакмак 2021 ел нәтиҗәләре буенча район­да беренче урынга чыккан, эшмәкәрлек буенча җирлек – икенче урында. Авыл эшмәкәрләренең (12 кеше) күпчелеге сәүдә, йөк ташу белән шөгыльләнә.

Олы Чакмак төп мәктәбендә 38 бала укый, балалар бакча­сына 8 сабый йөри. Җирлектә ФАП, мәдәният йорты, китапханә эшли.

Узган ел үзара салым хи­сабына зират капкалары алыштырылган, авыл ура­мы төзекләндерелгән, урам исемнәре эшләнгән. Халык көнкүрешеннән канәгать. Урамнарны яктырту, юллар торышы, су белән тәэмин итүдә проблемалар юк. Һәр кешенең ихатасында кое бар. Җирлек башлыгы рай­он җитәкчелегеннән буаны һәм янгын сүндерү машина­сын ремонтлауда ярдәм итүне сорады. Халыктан сораулар яңгырамады.

Римма Афзалова.

АЙРАТ ФАЗЫЛОВ ФОТОСЫ.