Йодрык кадәрле йомры бәрәңге

Узган ел бәрәңге уңышы мактанырлык булмады. Моның сәбәбен халык елның коры килүеннән күрде. Нәтиҗәдә күпчелек бәрәңгене сатып алып ашады. Бәрәңге ризыкларын куллануны чикләүчеләр дә аз булмагандыр.
Быел халык бәрәңгене август азагында ук ала башлады. Бәрәңгене алып бетереп, саклауга да куйдылар. Бәрәңгене тизрәк казып алуның сәбәбе дә бар: сабагы корып беткәч, үсентене нигә җир астында тотарга?! Хәер, өлкәннәр арасында: “Элек бәрәңгене август азагында ук ала идек”, – дип сөйләүчеләр юк түгел.
Мәлләтамактан Нәкыя һәм Әнвәр Шәмсетдиновлар бәрәңге уңышыннан зарланмый. Дөрес, бакчаның бер өлешенә печән утыртканнар. Шул рәвешле бәрәңге участогы да кимегән. 
– Яздан фреза белән эшкәрттек, шуңамы җир бик йомшак булды. Башкаларныкы кебек кәсле түгел. Ашлама өчен тирес кертәбез инде, – ди Әнвәр абый. – 19 майда утырткан идек. Бик матур тишелде. Әмма июль-августта яңгырлар булмау сәбәпле бәрәңге ваграк булды. Әмма быел уңыш узган елгыдан әйбәт, Аллага шөкер! Ашарга да, утыртырга да җитә. Өй базына да, тышкы базга да салдык. 
Хезмәттәшебез Оксана Исламова бәрәңге өчен махсус ашлама куллануы турында сөйләде. “Кызык өчен кибеттән ашлама алган идем. Берничә буразна бәрәңгене шушы ашламаны салып утырттык. Ашлама белән үстергән бәрәңге уңышы бермә-бер яхшы!” – ди ул.
Басудагысы түгел, амбардагысы – икмәк, ди халык. Уңышны җыеп урнаштыргач, күңел тынычланып кала. Өлкәннәр әйткәндәй, исән-сау ашарга язсын!