Инвалидлыгы булганнар да югары белем алачак

- Рәмилә Расыйховна, әлеге уку йортына укырга керү тәртибе белән таныштырыгыз әле.

- Бу уку йортында сәламәтлекләре чикле кешеләр укый ала. Биредә биш юнәлеш буенча уку мөмкинлеге тудырылган. Үз ихтыярың буенча сайлап алып, радиотехника, материаловедение һәм материаллар технологиясе, машина төзелеше производстволарын конструкторлар һәм технологияләр белән тәэмин итү, информатика һәм компьютер челтәрләре буенча югары һөнәри белем алырга була.

- Укырга кергән очракта, читтән торып уку мөмкинме?

- Юк. Бары тик көндезге бүлектә генә укыту каралган. Уку вакыты 4-5 ел тәшкил итә. Укулар барлык юнәлешләр буенча да бушлай.

- Әлеге уку йортының нинди өстенлекләре бар?

- Казан шәһәренең Туполев исемендәге КНИТУ уку йортының уку-тикшеренү һәм методик үзәгендә укыту өчен махсус шартлар булдырылган. Болар - электрон такталар, мультимедиа комплекслары, проекторлар, тавыш көчәйтүче һәм радио тапшыручы системалар, сыйныф тактасыннан компьютерга визуаль мәгълүмат тапшыру системасы һәм башкалар. Барлык уку аудиторияләре компьютер җиһазлары белән тәэмин ителгән.

- Рәмилә Расыйховна, укучыларны шушы уку йорты укытучылары укытамы? Әллә инде махсус галимнәр билгеләнәме?

- Укучыларга университетның иң яхшы галимнәре һәм укытучылары белем бирә. Уку йортында спорт белән шөгыльләнү мөмкинлеге дә тудырылган. Тагын шунысы сөенечле: укучылар тулай торакта бушлай яшәячәк.

- Укырга теләге булганнар кайда һәм кемгә мөрәҗәгать итә ала?

- Бу яңалык җирлегебез өчен бик файдалы булачак. Кулланып калырга киңәш итәр идем. Теләге булганнар алда әйтелгән уку йорты профессоры Анатолий Васильевич Кочергинга 8 (843) 571-96-96 телефоны аша мөрәҗәгать итә ала.

Әңгәмәдәш - Лилия Шәймиева.