Җилдән җитез Гөлфия

– Миңа 8 яшь тулган елны Ирекле авылы бетте һәм без Катмышка күчендек. Шун­нан бирле минем бер генә бәйрәмне дә калдырганым юк. Туган-тумача мине: “Бу бала, һичшиксез, артист була­чак!” – дип уйласа да, сәнгать кешесенең шәхси тормышы барып чыкмый дип, башка юл сайладым, – ди Гөлфия апа.

Озак еллар район хастаханәсенең балалар бүлегендә техник хезмәткәр булып эшли райондашыбыз. Шулай да сәнгать дөньясы белән кызыксынып яши, ак­тив яшәү рәвеше алып бара.

– Гөлфия апагыз быелгы авыл сабантуйларында да сынатмады. Елгабаш Сабан­туеннан зур бүләкләр белән кайтты. Сабантуйга киткәндә: “Җиңүләр гел сиңа гына бул­мас”, – дип калган идем, ми­нем сүзләремә ачу итеп, бөтен уеннарда катнашкан бугай. Көянтә-чиләк белән йөгерә- йөгерә су да ташыган, ка­шыкка йомырка салып та йөгергән, капчык киеп тә узышкан, чүлмәк тә ваткан! Бүләккә кофеваклагыч, бик күп матур савыт-саба алып кайткан. Бүләктән бигрәк, ярышларда шулай катнаша алуына сөенәм. 62 яшьтә бул­са да, күңеле 18дә аның, – ди тормыш иптәше Фазаил абый.

Гөлфия апа – Арча районының Шушмабаш авы­лы Сабантуена кадәр барган кеше. Анда аркан тартуда бе­ренчелекне алган. Мөслимдә хатын-кызлар көрәшен дә ярата Гөлфия апа.

– Тойгелде Сабантуе да бик матур узды быел. “Кем озак бии?” дигәннәр иде, азакка кадәр бертукта­мый ике сәгать биюче мин булдым. Бик матур тасты­мал бирделәр үземә. Икен­че көнне Ташлыяр Сабан­туена бардым. Яшь кызлар белән йөгерергә чыктым һәм өченче булып килдем. Яшьләр белән ярышырлык көчем булгач, өченче урын­га да бик риза! Районда уза­чак федераль Сабантуйга ба­рырга куркыта әле. Кеше күп булгач, оныклар белән өйдә утырырга булдым. Шулай да атлар чабышына чыгып ке­рермен, дип уйлап торам. Ат­лар чабышын минем кебек яраткан кеше бармы икән та­гын?! Атлар чапканда йөрәк дөп-дөп тибә. Үзем – трибу­нада, күңел җайдак иярләгән ат белән бергә чаба. Их, яра­там ат чабышын! Гомумән, Сабантуйны, бөтен уенна­ры, концерт-тамашалары белән бергә яратам! Сабан­туй бит ул карап утыру өчен генә түгел, анда катнашырга, үз өлешеңне кертергә кирәк! Менә шунысы иң зур бәхет аның! – ди Гөлфия апа.

Гөлфия апаның кызла­ры Гөлфинә белән Айгөл һәм оныклары да сабантуйларны көтеп ала. Әниләре, әбиләре белән кечкенәдән сабантуй­ларда катнашып, уеннарда җиңү яулаган кызлар быел да бәйрәмнәрнең үзәгендә булган.

– 13 яшьлек оныгым Әлфинә, Елгабаш, Тойгелде авылларында узган сабан­туйларда, капчык сугышын­да катнашып, беренче урын­ны алды. 11 яшьлек оныгым Зилинә Метрәй, Ташлыяр сабантуйларында йөгерүгә чыкты. 17 яшьлек оныгыбыз Ләйсән, Елгабаш Сабантуенда йөгереп, термопот отты. Кы­зыбыз Айгөл быел да ярыш­ларда беренче урынны баш­каларга бирмәде. Елгабаш­та – капчык киеп йөгерүдә, Тойгелде Сабантуенда капчык сугышында җиңүче булды. Айгөлемнең кызы – 14 яшьлек оныгым Ләйлә, йөгереп, бе­ренче урынны алды, 23 яшь­лек Алинә оныгым көянтә- чиләк белән су ташуда кат­нашты,– ди, балалары һәм оныклары белән горурланып, Фазаил абый.

Милли бәйрәмебезне көтеп алган Гөлфия апа ба­лаларында һәм оныкларын­да да әлеге бәйрәмгә кара­та мәхәббәт тәрбияли алган. Афәрин, Гөлфия апа!

Лилия Шәймиева.

Автор фотосы.