Фермерларның эресе дә кирәк, кечесе дә

Үзара салым узган ел Сөякәй, Октябрь, Бәкәбездә – 700 сум, Әндерештә 1000 сум күләмендә билгеләнгән булган. Алда­гы ел белән чагыштырган­да терлек саны кимегән, сыерлар саны да 72гә кал­ган.

2018 елдан җирлектә “Август-Мөслим” агрофирма­сы 3540 гектар мәйданда эш алып бара. Алдагы елларда басуларны берләштерү дәвам итәчәк, ди инвестор. Оешма­да җирлекнең ике дистәгә якын кешесе хезмәт куя. 177 пайчының җире алар­да арендада. Түләү буенча канәгатьсезлекләр булган. Аларны бетерү өчен килешү шартларын үзгәртергә кирәк, диде отчет чыгышында авыл җирлеге башлыгы Илгиз Хан­нанов.

Кошчы фермер Илнур Хәмәдишин хуҗалыгында се­зонда – дистәдән артык, Наил Муллинда өч кеше эш белән тәэмин ителгән. Җирлек баш­лыгы эшмәкәрләргә уңышлар теләп, аларның җирлекнең икътисади хәлен яхшырту­га үз өлешләрен кертүен дә теләде.

Сөякәй һәм Бәкәбездә су җитенкерәмәгән, шул сәбәпле резерв скважина­ны да кулланганнар. Икен­че линияне төп линиягә ял­гау кирәк, ди авыл җирлеге башлыгы. Чөнки нык тузу сәбәпле башняны алга таба кулланып булмаячак. Су то­туга контрольне дә арттыру таләп ителә. Су белән тәэмин итүгә лицензия алу буенча да шактый күләмле эш баш­карыла.

Урам яктырткычларын алыштыру, ремонтлау өчен аерым бригада яки эшче булу отышлы, дип саный Илгиз Ханнанов. Җирлектән рай­он Советы депутаты Кәрим Сәлимгәрәев ярдәме белән Сөякәйдә бер урамның ли­ниясе алыштырылган, бу эш алга таба да дәвам итәчәк. Октябрь авылында үзәк урамның күпчелек өлешенә гравий өстәлгән.

Иң күп сәламәтлек са­клау хезмәткәрләре Ок­тябрь авыл җирлегендә бу­гай: биредә дүрт авылга өч фельдшер хезмәт күрсәтә. Почта бүлекчәсендәгесен дә исәпләп, сәүдә нокталары да өчкә тула.

Кызганыч, башлангыч мәктәпнең дүрт сыйныфын­да нибары өч кенә укучы укый.

Сабантуйны яңа урында үткәргәннәр. Территориягә агачлар да утыртканнар. Октябрьдәге мәчеткә янкор­ма өстәлгән. Бу эш авыл хал­кы ярдәме һәм средствола­ры белән башкарылды дип, авыл җирлеге башлыгы кай­бер авылдашларын исемләп атады, мәчетнең бинасын һәм җирен рәсмиләштерү бу­енча эш бара диде.

Илгиз Ханнанов үзара са­лым хисабына башкарыл­ганнарны һәм башкарырга кирәк булганнарны барлагач, җыелышта катнашкан рай­он җитәкчелегенә үз көчләре җитмәстәй мәсьәләләр буен­ча мөрәҗәгать итте. Сүз Ок­тябрь һәм Әндереш авылла­рын күрсәтүче юл билгеләре һәм Мөслим-Актаныш трас­сасына чыгучы чатта юл билгеләре кирәклеге хакын­да булды. Шулай ук җыелыш барган бинага 2020 елның җәендә үк оптик-җепсел ли­ния җиһазлары урнашты­рылуга карамастан, интер­нетка ялгау эшен төгәллисе бар. Спортзалны ремонтлау мәсьәләсен авыл җирлеге башлыгыннан соң ветеран­нар советы әгъзасы Зәйтүнә Нуриева да күтәреп чыкты. Монда да районның ярдәме кирәк, диделәр чыгыш яса­учылар.

Агрофирма вәкиленә пай җирләре өчен түләү, өлкәннәр көненә пакетлар турында сораулар бирелде.

Баек авыл җирлеге, андагы эшләр торышы, үзара салым акчасы хисабына башкарылган эшләр һәм планнары турын­да узган ел язган идек инде (“Авыл утла­ры”, 10 декабрь 2021 ел). Шуңа күрә кабат­лап тормыйча, авыл җирлеге башлыгы Марат Фәхерлегаянов чыгышыннан соң яңгыраган берничә сорауга гына тукта­лып үтәбез. “Докладта барысы да матур булса да, авылда су юк, юл юк, ФАП шулай ук юк, юл булмагач, автокибет тә керми, – диде урыннан чыгыш ясаучы Сәфәр ке­шесе. – Югыйсә авылда халык бар, фермер да бар”. Кыш көне 11 сәгать су булмаган. Ашыгыч ярдәм машинасы килгәндә ке­рер юл тапмый, чөнки урамны кар баскан. Сәламәтлеге какшау булуга һәм эшнең шактый чыгымлы булуына карамастан, берничә тапкыр ул юлны үз техникасын­да ачкан. Мәктәп автобусы шоферы да уку­чыларны илтү өчен юлны үзенә чистар­тырга туры килүен әйтте. Ә бит Сәфәрдән, мәктәпкә дип, көн дә ун укучы чыгып китә. Бу бит Баек мәктәбендә укучыларның яр­тысы кадәр дигән сүз! “Юл оешмасы чи­стартканда карны машина чыгу өчен уңайсызлап өеп куя”, – диләр сәфәрлеләр һәм оешма техникасы авыл эчендәге юлны да чистарта алмасмы икән дип сорыйлар. Алмас шул, чөнки юлчыларның һәр “ады­мы” исәптә. Бу урында газетабызның Ка­занга һәм Мәскәүгә китүче экземплярла­рын югарыдагы җитәкчеләр дә укысын иде һәм мәктәп автобуслары программа­сын булдыргач, шул автобусларның кыш­кы юлларда йөрүен тәэмин итүче програм­малар да кабул ителсен иде дигән теләкне әйтәсе килә. Хәер, берничә елдан мондый проблема булмас та кебек, чөнки бакча- мәктәпләрдә балалар саны да, туучылар саны да елдан-ел кими. Әмма укучылар калмаса да, авылларда яшәүчеләр бар бит әле.

Озак еллар җирлекнең ветераннар со­ветын җитәкләгән Әюп Вәлиев җәмәгать эшеннән азат ителү сәбәпле бу вазый­фага Нурсинә Шәйхәйдәрова тәкъдим ителде. Җирлек башлыгы Әюп Вәлиевкә рәхмәтен белдерде.

Ике җирлектә дә район эчке эшләр бүлеге җитәкчесе Рөстәм Мөхәмәтҗанов, тормыштан мисаллар китереп, мошен­никлык очраклары турында сөйләде, уя­улыкны югалтмаска чакырды.

Җирлектә тулы канлы тормыш бар­сын өчен фермерларның эреләре дә, кечеләре дә кирәк, дип ассызыкланды җыелышта.

Мөнирә Арсланова.

Фото – Баек авыл җирлеге архивыннан.