Электрон хезмәт кенәгәсе

Мөслим районында клиентларны кабул итү хезмәте белдерүенчә, россиялеләр өчен электрон хезмәт кенәгәләрен рәсмиләштерү 2020нче елның 1 гыйнварыннан башланды. Эшләүче барлык гражданнар өчен дә хезмәт эшчәнлеге турындагы мәгълүматларның яңа форматына күчү ирекле һәм бары тик кешенең ризалыгы белән башкарыла. 2021 елда беренче тапкыр эшкә урнашучыларның хезмәт турындагы мәгълүматлары бары тик электрон форматта гына алып барылачак.

Кәгазь хезмәт кенәгәләрен саклау турын­да гариза бирүчеләрнең шул хезмәт кенәгәсе саклана һәм электрон хезмәт кенәгәсе дә ту­тырылып барачак. Мондый затлар хезмәт эшчәнлеге турындагы мәгълүматны элек­трон рәвештә дә алырга хокуклы. Моның өчен гариза тапшыру да җитә. Әгәр кеше хезмәт кенәгәсенең кайсы төрен сайлау ту­рында гариза язмаса, аның кәгазь формат­тагы кенәгәсе кала. Электрон форматны сай­лаучылар исә кәгазь форматка кире кай­та алмый. Кәгазь хезмәт кенәгәсе, элеккеге стажны раслау өчен рәсми документ була­рак өйдә саклау өчен, аларның кулына тап­шырылачак.

2020нче елның 31 декабренә кадәр гари­за язарга мөмкинлекләре булмаучылар, төп эш урыны буенча гариза тапшырып, моны теләсә кайсы вакытта эшли ала.

– Эшләүче кешенең хезмәт стажы ту­рындагы мәгълүматлары югала алмый – бу электрон форматның төп өстенлеге. Эш бирүче гамәлдән чыгарылган очракта да хезмәткәр Россия Пенсия фондыннан үзенең эш чоры хакында мәгълүматны соратып алырга мөмкин, – ди Мөслим районында клиентларны кабул итү хезмәте җитәкчесе Фәридә Ганиева.

Моннан тыш чит ил паспортын рәсмиләштерү өчен яисә ЭТК ипотекасы алу өчен кирәкле мәгълүматны ПФР сай­тындагы шәхси кабинеттан яисә дәүләт хезмәтләре порталыннан алырга була. Аның электрон имзасы да булачак һәм әлеге документ барлык инстанцияләр өчен дә ярый, диләр Мөслим районында клиент­ларны кабул итү хезмәте белгечләре. Шун­да ук хезмәткәр эш бирүче катнашыннан башка үзенең хезмәт эшчәнлеге турындагы мәгълүматлардан файдалана ала, шулай ук үзгәрешләр белән дә таныша ала.

Мөнирә Арсланова.