Ел катлаулы булды, әмма уңышлар да бар

– Предприятие елны нинди нәтиҗәләр белән тәмамлый?

– Үрәзмәт товарлыклы сөтчелек комплек­сын эшләтеп җибәрү бөтен район өчен зур ва­кыйга булды. Фермада эшләр дәвам итә, сөт савып алу артуга бара. Бүген биредә көнгә ур­тача 37 тонна сөт савыла, продуциянең сый­фаты югары.

Ел дәвамында комплекска бер-бер артлы төрле регионнардан белгечләр, делегацияләр, журналистлар килде. Комплекс масштабы һәм технологиясе буенча уникаль, бу хакта “Авыл утлары” газетасында да берничә тап­кыр язылды инде. “Агроинвестор 2021” мил­ли премиясе кысаларында тармак экспертла­ры проектка “Запуск года” номинациясендә беренче урын бирде.

– “Август-Мөслим” алдынгы агрофирма буларак дан казанды. Мөслим районындагы сөрүлек җирләрнең 38 проценты – компа­ния биләмәләренә керә. Корылык уңышка ни дәрәҗәдә тәэсир итте?

– Озак вакытка сузылган югары темпера­тура һәм корылык барлык культураларның диярлек уңдырышлылыгына тәэсир итте. Планлаштырылганны тулы күләмдә җыеп ала алмадык. Шуңа да карамастан, җитештерелгән продукциянең сыйфаты юга­ры булу куандырды. Мәсәлән, бөртеклеләрнең клейковина һәм аксым күрсәткече югары булды. Продукция ел саен куркынычсыз­лыкка тикшерелә. Анализ нәтиҗәләреннән күренгәнчә, быел да пестицидлар, микоток­синнар, радионуклеидлар, авыр металларның булмавын рәсми рәвештә раслый. Безнең про­дукция азык-төлек продуктлары һәм терлек азыгы җитештерү өчен яраклы.

– Узып баручы ел тагын нинди уңышлар белән истә калачак? Яңа объектлар сафка бастымы?

– Тойгелде авылы янында эремә узелын эшләтә башладык. Бу хезмәтне җиңеләйтте һәм эшкәртүнең нәтиҗәлелеген арттырды. Ел башында Иске Карамалыда орлык фон­дын тәэмин итү максатында ашлык чистарту комплексы эшли башлады. Минем уемча, иң мөһиме – безнең фермага һәм басуларга бөтен Россиядән студентлар килә башлады. Булачак белгечләр компаниянең технологияләрен үзләштерәләр һәм яңадан безгә кайталар. Яшьләр агрофирмаларда эшли башлар, дип ышанасы килә. Хезмәткә түләү күләме буен­ча шәһәр белән авыл арасындагы аерма кими бара. Кайбер белгечләр һәм эшчеләр уртача шәһәрнекеннән югарырак хезмәт хакы ала.

– “Август-Мөслим”не “үзенә җәлеп итүчән эш бирүче” дип буламы?

– Әлбәттә! Бездә хезмәт шартлары яхшы. Хезмәт хакы айга ике тапкыр тотрыклы рәвештә бирелә. Еллык хезмәт нәтиҗәләре буенча өстәмә премия языла. Агрофирма хи­сабыннан хезмәткәрләр кайнар көндезге һәм кичке аш белән тәэмин ителә, механизатор­ларга кайнар аш басуга илтелә. Химик пре­паратлар белән эшләүчеләр ел саен санато­рийда ял итә. Дөньядагы катлаулы вәзгыять хезмәткәрләр тормышында берничек тә ча­гылыш тапмый, алар социаль яктан ыша­нычлы якланган. Ул гына да түгел, “Август- Мөслим” районга да зур ярдәм күрсәтә. Быел авыл хуҗалыгы җитештерүенә кирәкле әйберләргә бәяләр һәм чыгымнар артуга ка­рамастан, 6 миллион сумнан артык акча рай­он проектларын тормышка ашыруга – Җиңү көнен, Мөслимдә федераль Сабантуйны, ту­ган телләр һәм халыклар бердәмлеге елын үткәрүгә юнәлдерелде.

– Пайчылар белән мөнәсәбәтләр ничек?

– Бер-береңә ышану һәм уртак мәнфәгатьләрне хөрмәт итү – без берничә ел инде шушы принциптан чыгып эшлибез. Арендадан керемне ничек алырга икәнен – акчалатамы яисә продукция беләнме – пай­чылар килешү нигезендә үзләре хәл итә. Бу ел да искәрмә булмады. Күпчелек пайчылар бөртеккә өстенлек бирде. Дефицитка карама­стан, без бурычыбызны төгәл үтибез. Пайлар­ны да, милекчеләрнең җир участокларын да яхшы бәядән сатып алырга әзер икәнебезне дә исегезгә төшерәм. Безгә мөрәҗәгать итә аласыз.

– Алдагы елга нинди планнар куелды?

– “Үрәзмәт” товарлыклы-сөтчелек комплексының 1200 баш сыерга исәпләнгән икенче чиратын җибәрүне көтәбез. Биредә сыер саву 40 урынлык “карусель” тибы буен­ча оештырыла. Технологияләр комбинаци­ясе ферманы тагын да үзенчәлеклерәк итә. Голштин токымлы таналар кайтаруны дәвам итәчәкбез.Үсемлекчелектә дә яңалыклар бу­лачак. Азык клины өчен сугару системасы төзиячәкбез. Бу корылык шартларында риск­ны киметергә мөмкинлек бирәчәк. Һәр ел тәҗрибәбезне баета, алга таба баруны дәвам итәбез. Барлык мөслимлеләргә сәламәтлек те­лим, калганы һәркемнең үзеннән тора.