Егетләр солдат шинеле кия

Быел көзге чакырылышта 25 егет армия сафларына алыныр дип көтелә. Беренче ике озатуда тугыз якташыбыз хәрби хезмәткә китте. Бу атнаның дүшәмбесендә Катмыш авылыннан Илназ Галимәрданов, Яңа Усыдан Никандр Петров, Мөслимнән Ленар Җәлилов, Вәрәшбаш авылыннан Илсур Кира­мов бер елга әти-әниләре, якынна­ры белән саубуллашты.

– Көзге чакырылыш компаниясе старт бирелгәнче 100дән артык егет ме­дицина комиссиясен үтте. Егетләрнең сәламәтлекләре ныклы, ихтыярлары көчле. Армиягә үз теләкләре белән ба­рулары аларның чын ир-егетләр булып өлгерүен күрсәтә. Күбесенең танкист бу­ласы килә. Гаскәрләрне “престижный”га бүлеп карый кайберәүләр. Ләкин һәр төр гаскәр сугыш кырында алыштыргысыз роль уйный, – ди хәрби хезмәткә чакы­ру буенча резервтагы комиссия рәисе Илшат Яббаров.

– Баланы читкә җибәрү бик читен. Балаң өчен өзгәләнмәгән көнең-сәгатең бармы икән?! Чит җирдә балаларга яңа коллективка өйрәнәсе, дисциплинага буйсынасы, илебез чикләрен саклыйсы бит! Бу сынауларны һәр солдат җиңел үткәрсен иде. Әти-әниләргә балаларын исән-сау каршы алырга язсын! – диде улларын озатырга килгән әти-әниләр.

Көзге чакырылышта армия сафла­рына алынган мөслимлеләр бүгенге көндә Мәскәү өлкәсендә, Оренбург, Санкт-Петербург шәһәрләрендә хезмәт итәләр. Бу чакырылышта тагын өч оза­ту көтелә. Алар 22, 28 ноябрьгә һәм 7 декабрьгә планлаштырылган.

Бүгенге көндә 72 райондашыбыз төрле округларда Ватан алдындагы изге бурычларын үти. Мөслим районы белән хезмәттәшлек турында килешү төзегән Муллино бистәсендәге хәрби частьтә ике якташыбыз хезмәт итә.

– Егетләрне армиягә озаткан­да коронавирустан саклануның бөтен таләпләре дә үтәлә. Хезмәткә китүчеләрнең барысына да вакци­нация ясалган. Булачак солдатларны хәрби частьләргә кертер алдыннан ях­шылап тикшерәләр. Авыру солдатлар хәрби хезмәткә алынмый, – ди Мөслим һәм Сарман районнары буенча хәрби комиссар Дажгын Гасанов.

– Мөслим егетләре контракт нигезендә хезмәт итүгә дә уңай ка­рый. Бүгенге көндә биш егет кон­тракт буенча хезмәт итә. Көзге чакы­рылышта да контрактчылар саны ар­тыр дип көтелә. Кулында нинди дә бул­са һөнәр үзләштерү турында таныклы­гы булган егетләргә сорау зур. Быел хәрби хезмәткә алынган егетләрнең күбесенең машина йөртү таныклыгы бар. “С” һәм “Д” категорияләре булу – зур плюс булып тора, – ди Илшат Яб­баров.

Лилия Шәймиева.