Дуслыгыбыз өзелмәсен!

Соңгы арада халыктан по­чта эшчәнлегенә карата: “Газе­таны вакытында китермиләр”, “Хат-извещениеләр башка адреска җибәрелгән”, “Газета югалган” кебек сүзләр еш ишетелә. Һәркемнең вакыт­лы матбугатны үз вакытында аласы, укыйсы килә! Ул бит аның өчен акча түләгән!

Берәүгә дә сер түгел, бүген почтада эшләргә атлыгып торучы юк. 13 мең сум хезмәт хакына кем килсен?! Өйдә яткан өчен акча бирүче булмаса да, күпләр эш­сез ятуны хуп күрә төсле.

– Вакытлы матбугатка күпчелек өлкән буын языла. Халыкның зары аңлашыла, чөнки яраткан, акчасы түләнгән газе­та-журналны вакытында аласы һәм укыйсы килә! Ләкин бүгенге көндә по­чта эшчәнлеген өзлексез алып бару өчен эшчеләр саны җитми. Эшләргә теләге бул­ганнарны почтада көтәбез! – ди район почта элемтәсе узелы җитәкчесе Лилия Нурмөхәмәтова.

Бүгенге көндә районда 16 почта бүлекчәсе эшли. Аларда 48 хат ташучы хезмәт куя. Почтада үз һөнәренә гашый­клар гына эшли аладыр. Хат ташучының хезмәт хакы план үтәүгә бәйле. Вакытлы матбугат таратудан тыш, райондашлары­бызга пенсия дә тарата хат ташучылар, көнкүреш товарларын һәм азык-төлек тә саталар.

Мөслим почта бүлегендә дүрт опера­тор эшли. Почта машиналары (шофер­лар – икәү) дүшәмбе, чәршәмбе һәм җомга көннәрендә өч юнәлештә урыннарга по­чта илтә. Почта бит әле ул вакытлы мат­бугатка язылу урыны гына түгел! Биредә бик күпләр коммуналь хезмәтләр өчен түләүләр башкара, төрле штрафлар түли. Һәр көнне 50гә якын посылка, йөзләгән хат, 3000нән артык газета-журнал кайта. Кытайдан кайткан исәпсез-хисапсыз за­казлы посылкаларны кабул итү дә шак­тый көч һәм сабырлык сорый,– ди район почта элемтәсе узелы җитәкчесе Лилия Нурмөхәмәтова.

Вәрәшбаш, Олы Чакмак һәм Шуган­ка авылларында бер үк хезмәткәр почта бүлекчәсен дә җитәкли, хат ташучы вазый­фасын да башкара. Тат.Бүләр, Симәк, Яңа Усы һәм Тойгелде авыл җирлекләрендә почта бүлекчәләрендә эшләргә кеше юк! Бүлекчәләр ябылгач, газета-журналлар та­ратуда өзеклекләр булмасын өчен, вакыт­лы матбугатны әлегә мобиль оператор та­рата. Торыш, Елгабаш авылларына да хат ташучылар кирәк! Әлеге мәсьәлә тиз ара­да хәл итүне сорый!

– Халыкка зур үтенечебез бар – матур итеп коелган капка-коймаларының бер почмагына газета-журналлар өчен по­чта тартмасы куйсыннар иде. Күпвакыт газета, извещение яисә хат салырга урын тапмыйбыз. Аннан: “Миңа извещение китермәгәннәр, хатым югалган, газета­ны урлаганнар!” – диләр. Үзара аңлашып эшләргә иде! – ди Мөслим почта бүлеге җитәкчесе Эльмира Идиятуллина.

Почтальонның эше җиңел түгел. Ләкин узган гасырның 80-90нчы еллары белән чагыштырганда, хат ташучының букчасы шактый җиңеләйде. Чөнки элеккечә вакытлы матбугатка күпләп язылучы юк. Заманага яраклашып, га­зета-журналларны интернет аша укыган булабыз. Бездән соңгы буын газета белән ихластан кызыксынырмы? Ни дисәң дә, типография исе килеп торган газетаны укуга җитми инде!

“Авыл утлары” (“Сель­ские огни”) газетасы­на, шулай ук “Сөембикә”, “Казан утлары” жур­налларына альтернатив ысул белән язылырга була. Бу очракта вакыт­лы матбугатка Мөслим-информда язылырга һәм газета-журналларны шуннан ук килеп алырга кирәк була.

Лилия Шәймиева.