ДОСААФ кубогын кем алды?

Бәйгедә барлыгы ту­гыз команда көч сынашты. Ярышларга Әлмәт һәм Сар­ман районнарыннан да ко­мандалар килгән иде.

– Районда волейболны популярлаштыру, әлеге уен төре буенча көчле коман­даларны ачыклау, сәламәт яшәү рәвешен пропагандалау максатыннан оештырылган ярышта командалар актив бу­лулары белән аерылып тор­ды. Уеннарда йөздән артык спортчы катнашты. Мондый бәйге быел беренче мәртәбә үткәрелде. Киләчәктә ДОСА­АФ кубогына волейбол ярыш­ларын ел саен үткәрербез, дип планлаштырабыз, – ди ДОССАФның район бүлеге җитәкчесе Марат Бәйрханов.

Ярышларның хөкемдары Шамил Мадьяров билгеләп үткәнчә, әлеге спорт төре ко­мандалы булуы белән аеры­лып тора. Бәйгедә катнашучы командаларның бердәм булу­ына игътибар иттек. Ярыш­лар 10 сәгать дәвам итте.

– Без – Мөслимдә еш кунак. Бер генә спорт чарасыннан да калганыбыз юк. Биредә бәйгеләрне матур итеп оеш­тыра һәм үткәрә беләләр. Мөслимдә эчкерсез, кунак­чыл халык яши. Бәйгеләрдән соң сый-хөрмәт күрсәтми кайтарып җибәргәннәре юк. Ярышны оештыручыларга һәм безне бәйгегә чакыручы­ларга рәхмәт, – диде Сарман районы командасы егетләре.

Ки е р е н ке уенның нәтиҗәләренә килгәндә, беренче урынга Әлмәт районының “Система сер­вис” командасы лаек бул­ды. Икенче урын Сарман командасына бирелде. Ә мөслимлеләргә өченче урын белән канәгатьләнергә туры килде. Районыбызның “Ил­транс” командасы башта ал­дырып китсә дә, уенның ахы­рына таба егетләр, күрәсең, арып китте.

Җиңүче командаларга ДОСААФның район бүлеге Мактау грамоталары, стату­эткалар тапшырды. Беренче урынга чыккан әлмәтлеләр күчмә кубокны алды.

– Волейболны яратмаган кеше юктыр. Бу уен тизлекне генә түгел, көч һәм егәрлекне дә сыный. Даими рәвештә волейбол уйнаучылар гәүдә матурлыгы белән аерылып тора, – ди дустының уйнага­нын карарга килгән Ландыш Ганиева.

Лилия Шәймиева.

Лилия Шәймиева фотолары.