Бу көнне Мөслимдә

1971 ел

“Трудовик” һәм “Мөслим” совхозлары эшчеләренең азык һәм промышленность товарларына ихтыяҗларын канәгатьләндерү өчен безнең сәүдә эшчеләре армый-тал­мый эшли. Узган ун айда гына да 1 506 200 сумлык товар сатылды һәм товар әйләнеше планы 101 про­центка үтәлде. Пай взносла­ры җыю һәм кооперативка яңа членнар тарту уңышлы алып барыла. Халыктан авыл хуҗалыгы продуктлары са­тып алуга да зур әһәмият бирәбез. Агымдагы елның ун аенда 220 713 данә йомыр­ка җыеп озаттык. Бу – һәр хуҗалык уртача 209 данә йо­мырка сатты дигән сүз.

З. Харисов,

“Мөслим” совхозы эшчеләр кооперативы

председателе.

16 ноябрь

Ремонт төгәлләнә

“Алга” колхозы механиза­торлары, туңга сөрүне сро­гыннан алда тәмамлагач та, язгы һәм җәйге кыр эшләрендә кулланылачак авыл хуҗалыгы машинала­рын ремонтлауга җиң сызга­нып керештеләр. Чәчкечләр, тырмалар, культиваторлар, комбайннар чистартылып, ремонтлап урнаштырыл­ды. “Сельхозтехника” район берләшмәсендә соңгы трак­торны ремонтлау төгәлләнә.

З.Сабитова.

Табынны ямьлибез

Мөслим икмәк пешерү заводы эшчеләре агым­дагы елның үткән ун ае эчендә сәүдә челтәрләренә 1469 тонна ипи, 107 тонна булка әйберләре, 30 тонна­га якын баранкалар озатты. Планнан тыш 15 600 сум­лык продукция сатылды. Дүртенче разрядлы мастер­лар Вәсимә Сәлимова һәм На­зыйма Синәкәева сменасы продукциянең сыйфатына аеруча зур игътибар бирәләр.

Г.Дәүләтшина.

18 ноябрь

Җир витамин ала

Район игенчеләре киләсе ел уңышына ышанычлы ни­гез салу өчен күп эш баш­кардылар. Агротехник сро­кларда 15836 гектарда көзге чәчү үткәрелде. 65 000 гектарга якын мәйданда туңга сөрелде. Күпчелек хуҗалыклар чәчүлек ор­лык калибрлауны инде төгәлләделәр һәм авыл хуҗалыгы техникасын ре­монтларга керештеләр. Басу­ларга тирес чыгару “Правда”, Калинин исемендәге колхоз­ларда зур оешканлык белән башланды. Соңгы елларда тирес чыгару буенча меха­никалаштырылган звенолар күпләп төзелде. Алар үзләрен тулысынча аклыйлар.

М.Әхмәтова.

Сәхифәне Мөнирә

Арсланова әзерләде.