Бу көнне Мөслимдә

1971 ел. 17 апрель

Сынатмабыз

“Алга” колхозыннан өмәдә 76 ВЛКСМ членының барысы да катнашачак. М. Вахитов исемендәге колхоз­дан Бөтенсоюз коммунистик өмәгә 760тан артык кеше чыгачак. “Трудовик” совхо­зында да бу көнгә конкрет план төзелде. Исәпләүләр күрсәткәнчә, өмәдә 650дән артык кеше катнашачак.

20 апрель

Районыбызда Бөтенсоюз коммунистик өмә зур оеш­канлык белән үтте. Анда 12450 кеше катнашты. Өмәдә эшләп алынган 7627 сум акча тугызынчы бишьеллык фон­дына кертелде.

5 май

4 майга район хуҗалыкларында 10905 гек­тар уҗым һәм 3088 гектар мәйданда күпьеллык үлән чәчүлекләре тукландырыл­ды, 1865 гектар күпьеллык үлән чәчүлеге, 104 гектар уҗым культуралары, 1167 гектар туңга сөрелгән җир тырмаланды, 136671 центнер орлык җылытылды, шуның 64508 центнеры агуланды.

Механизаторлар өчен кичә

Авыл культура йортында механизаторлар өчен кичә үткәрелде. Беренче өлештә колхоз агрономы Г. Нуретди­нова “Агулы химикатлардан саклану һәм агуланганда бе­ренче ярдәм күрсәтү чарала­ры” турында доклад укыды. Икенче өлешендә викторина булды. Чәчү коралларының төзелеше, ашламаларны куллану тәртибе һәм авыл хуҗалыгы техникасының материаль өлешенә кагы­лышлы сорауларга иң дөрес җавапларны М. Фәхриев һәм Х. Газизов бирде.

Р. Нигъмәтуллин,

“Кызыл Октябрь”

колхозы.

“Чукмаргали” почмагы

Авылдашым чәйгә ча­кырды. Стаканнарга арба майларлык куе чәй агызды да ипи кисә башлады.

– Үзеңне Мөслим пекар­нясында пешерелгән икмәк белән сыйлыйм әле бер, – дип сөйләнгәндә... “Шалт!” – пычагы нәрсәгәдер барып бәрелде. Пычак йөзеннән оч­кыннар чәчрәде.

– Ят, – мин әйтәм, – ло­жись! Кәпселенә тиде бугай.

Башны тотып, йөзтүбән аудык. Шактый яттык – шартламады. Урындыкны калкансыман тотып, бухан­кага якынлашабыз, батыра­еп, теге әйберне актарып ала­быз. Шактый зурлыктагы ти­мер кисәге!

Б. Гәрәй,

М. Бүләр авылы.

Сәхифәне Мөнирә Арсланова әзерләде.