Бу көнне Мөслимдә

1971 ел

24 август

Музей – тәрбия үзәге

1966-1967 уку елында крайны өйрәнү музее оештырырга бул­дык. 17 кешедән музей советы төзелде. Кыска гына вакыт эчендә 1800гә якын экспонат тупладык. Экспонатлар арасында Екатери­на IIнең язмалары, кыйммәтле бизәнү әйберләре, VIII-IХ гасыр­ларда кулланылган җир эшкәртү кораллары, ак сакаллы карт пор­треты. Ул – И.П.Кудряшев рәсеме. Сембер бояры бабасын һәм әтисен, тагын өч семьяны Шу­ран боярына эткә алмаштырып биргәндә аңа 10 гына яшь була.

Н.Галиева,

РСФСРның атказанган укытучысы, Мөслим урта мәктәбе.

31 август

Һәр семьяга –

газета-журнал

1971 елда безнең район, га­зета-журналларга язылу планын арттырып үтәп, республикада бе­ренче урынны яулады. Районы­быз хезмәтчәннәре 3782 данә үзәк газеталары, 7642 данә үзәк жур­наллары, 8213 данә өлкә газета­лары һәм 8865 данә өлкә журнал­лары алалар. “Авыл утлары” һәм “Сельские огни” газеталары 6684 данә таратылды. Бу – һәр мең кешегә 1125 данә газета, дигән сүз. 1970 ел белән чагыштырган­да һәр мең кешегә 25 данә газета артык таратылды.

М.Дәүләтшина,

“Союзпечать”нең район бүлеге начальнигы.

4 сентябрь

Истәлекле көн

Мөслим урта мәктәбендә бы­елгы уку елында тугызынчы клас­сларга 180гә якын укучы кабул ителде. Бу уку елында мәктәпне 190нан артык кеше тәмамлаячак. Бәйрәм көнне мәктәп директо­ры В.Иванов тәбрикләү сүзе белән чыкты. Пионерка З.Сабирова, ком­сомолка В.Кадыйрова, әдәбият укытучысы Т.Гайфуллина уку­чыларга иң яхшы теләкләрен белдерделәр.

Трибунада – Киров исемендәге колхоз председателе, Социалистик Хезмәт Герое Лот­фулла Мусин. Ул фән нигезләрен нык үзләштерергә өндәде.

М.Фәтхуллин,

укытучы.

Мөслим урта мәктәбе.

7 сентябрь

Беренчелек – Биктимердә

Киров исемендәге колхозның Мөслим бригадасы механизатор­лары, туңга сөрүнең уңышны арттыруда мөһим чара икәнен аңлап, көнне-төнгә ялгап эшлиләр. Тракторчыларның эш күрсәткечләре югары. Мәсәлән, Биктимер Мөхәмәтҗанов К-700 тракторы белән эш башыннан 230 гектар туңга сөрде. Көнлек күрсәткече – 15 гектар.

Д.Хафизов,

бригадир.

Аерма кими бара

Китап укучылар саны 500 кеше. Алар ел башыннан 5 мең китап алып укыдылар инде. Моннан тыш 58 хуҗалыкның шәхси китапханәсе бар. Һәр хуҗалык 4-7 данә газета-жур­нал ала. Узган ел 8 классны тәмамлаган 25 укучының ба­рысы да техник училищелар­да һәм 9 класста укуларын дәвам итәчәк. 32 кеше кичке мәктәпнең 9-10 классларында, 12 кеше 11 класста укыячак.

М.Мөбарәкова, авыл советы председателе.

Сәхифәне Мөнирә Арсланова әзерләде.