Безне нинди киләчәк көтә?

Аларның гаиләсендә ике бала тәрбияләнә. Әти кеше читкә йөреп эшли, айга бер кайтып китә. Әлеге ханымның тәртибен балигъ булмаганнар комиссиясендә карауны сорап район социаль яклау бүлегеннән тәкъдим кергән. Бүлек психологы Лилия Петрова сүзләреннән күренгәнчә, әни кеше даими спиртлы эчемлекләр куллана. Социаль яклау бүлеге хезмәткәрләренең берничә тапкыр чакыруына да карамастан, ни сәбәпледер бүлеккә килмәгән. Ханым эшкә урнашу, эчкечелектән дәвалану турындагы тәкъдимнәрне дә җавапсыз калдырган. Социаль яклау бүлеге бу гаиләне даими күзәтчелеккә алырга мәҗбүр була. Нәтиҗәдә ана тиешле кеше комиссия каршында җавап тота. Комиссия членнары аңа бу начар гадәттән арынырга кирәклеген, зур ялгышлык эшләвен аңлатырга тырышсалар да, ханымның гына кыяфәте үзгәрешсез калды.

– Сезгә үзегезнең тормышыгызга битараф булмаска кирәк, үзегезне нинди киләчәк көткәнен әз генә булса да уйлыйсызмы? Төзәлергә әле соң түгел, бүген бөтен нәрсә сездән тора. Балаларыгыз яхшы укый, төрле ярышларда катнашып Мактау грамоталары алып кайтканнар. Укытучылар да алар хакында бары тик уңай фикерләр генә әйтәләр. Ә сез аларга нинди үрнәк күрсәтәсез? – ди балигъ булмаганнар комиссиясе рәисе Марина Бәдретдинова.

Комиссия рәисе урынбасары – район мәгариф идарәсе җитәкчесе Рафаэль Демидов мондый яшәү рәвешенең бик аяныч тәмамланырга мөмкин булуын әйтте:

– Ирегезне эчкән өчен бирегә чакырсак бер хәл, ә бүген без “әни” кешенең эшен карарга мәҗбүрбез.Гаилә башлыгы айлар буе эштә йөри, акчасын алып кайтып бирә. Димәк, сез балаларның хакын туздырасыз, аларның ризыгын кисәсез. Ә киләчәктә ирегез сезнең шундый тәртипсез тормышта яшәвегездән туеп ташлап чыгып китмәс микән? Кылганыгызга нәтиҗә ясагыз.

Район прокуроры ярдәмчесе Илвир Бәхтиевнең “Ни өчен, социаль яклау бүлеге хезмәткәрләре чакыргач, килмәдегез, эш эзләп карадыгызмы, мондый яшәү рәвешенең сәбәбе нәрсәдә? – дигән соравы да ханым тарафыннан җавапсыз калды.

Ханымга эчкечелектән дәвалану өчен 10 октябрьгә кадәр вакыт билгеләнде.

Ул көнне балигъ булмаганнар комиссиясендә эшләре каралырга тиеш булган ике гаилә, гомумән, утырышка килмәгән иде. Әллә алар балаларының киләчәгенә шулкадәр битараф, әллә бүгенге яшәү рәвеше кадерлерәкме? Бу сораулар, җавапсыз табышмак булып калды.

Фәридә Гайнетдинова.

Фото - Pixabay.com