Авыруны бергәләп җиңик!

18 яшьтән өлкәннәрнең кимендә 60 проценты прививка ясатса, хәл бераз җиңеләер иде. Бүген вакцинация темпы сөенерлек түгел. Халык бу процедураның ни дәрәҗәдә мөһим булуын аңлап бетерми, күрәсең, – ди үзәк хастаханәнең баш табибы Данияр Якупов.

Мәгълүмат чараларында коронавируска каршы прививка ясатуның мөһимлеге ту­рында күп яздык. Җирлегебездә авыручы­лар саны арта башлагач, вакцинаның куркы­ныч булуы хакындагы төрле уйдырмаларга ышанып яшәгән халык, ниһаять, йокысын­нан уяна башлады кебек. Район үзәгендә һәм авылларда эшли башлаган мобиль вакцина­ция пунктларының да файдасы булгандыр, чөнки кайберәүләр, коронавирус йоктыру­дан куркып, хастаханәгә бармый.

– Узган ел көз бик каты авырдым, бик авыр булды. Тагын авырыйсым килми. Бик озак уйлаганнан соң, 18 август көнне “Миз­гел” яшьләр үзәгендә урнашкан мобиль пун­ктта прививка ясаттым. Без, өлкәннәр, авы­ру йоктырудан куркып, хастаханәгә барыр­га кыймыйбыз. Мобиль пунктларның оеш­тырылуы бик отышлы. Оештыручыларга рәхмәт! Әле бит яшисе, дөньяның матурлы­гын күреп, үз аякларыбызда йөреп, тормыш­ка сөенеп гомер итәсе килә. Тиздән тагын бер оныгым туарга тиеш. Оныкларга сөенеп, бәхетле әни, кадерле әби булып яшисем килә, – ди райондашыбыз Нурания Әюпова.

Участок табибларына беркетелгән фельдшерларның да вакцинацияләүгә җаваплылык белән каравы сизелә башлады.

– Вакцинациянең әһәмиятен аңлату өчен халык белән күзгә-күз сөйләшү кирәк. Әмәкәй авыл җирлегендә 194 өлкән кеше яши. Шуларның 139ы коронавируска каршы прививка ясатты, – ди Әмәкәй авыл җирлеге башлыгы Илнара Шакирьянова.

Табиблар әйтүенә караганда, узган ел ко­ронавирусны нигездә өлкәннәр авыр кичерсә, быел авыру урта яшьтәгеләрне “штурмлый”.

– Өч балам төрле шәһәрләрдә гомер кичерә. Алар янына барырга куркып, кешеләр белән аралашудан качып йөрисем килми, шуңа һич икеләнмичә вакцина ясаттым. Ко­ронавирус безгә каршы көрәш алып барырга тиеш түгел, без аңа каршы көрәшергә тиеш, – ди пенсиядәге Әлфия Измайлова.

Бүгенге көндә Мөслим район хастаханәсендә һәм Яр Чаллы шәһәренең йогышлы авырулар хастаханәсендә 37 рай­ондашыбыз дәвалана. Шулардан 13енең хәле уртача авырлыкта. Коронавирус яки ул кузгаткан хроник авырулар нәтиҗәсендә якты дөньядан китүчеләр дә әз түгел. Ел ба­шыннан 63 кешегә ковид диагнозы куел­ган, 10 кеше әлеге чир белән якты дөньядан китеп барган.

– Вакцинацияләүнең ике этабында да организмда бернинди үзгәрешләр дә сизмәдем. “Прививкадан соң үлгән” дигән сүзләргә ышанмагыз! Авыруга каршы тору өчен хөкүмәтебез бушлай вакцина тәкъдим итә икән – ясатырга кирәк! Төрле уйдыр­малар сөйләүчеләрнең максаты бер – кот­кы тарату. Сау-сәламәт булып яшәүгә ни җитә! Столбнякка каршы прививка ясат­мыйча вафат булучылар, параличланучы­лар турында беләбез бит. Бу вакцина да куркыныч авырудан саклану өчен кирәк, – ди район иҗтимагый советы рәисе Ру­шат Солтанов.

Алда әйтелгәнчә, 60 яшьтән узган па­циентларга прививка ясату өчен медици­на учреждениесенә барып йөрисе дә юк. Үзегезгә уңайлы мобиль вакцинация пун­ктында вакцинация үтәргә була. Үзең белән паспорт, полис, СНИЛС булуы мөһим. Алга таба да мобиль вакцинация пунктлары гра­фик нигезендә күпфатирлы йортлар ише­галдында эшләячәк.

Лилия Шәймиева.

Автор фотосы.