Җаваплы хезмәт

Район метеостанциясендә Илнара Хәмидуллина кул астында дүрт кеше эшли. Алар – техник-метеорологлар Ну­рания Нәҗмиева, Нәзилә Сибаева, Әнисә Садыйкова, өлкән техник-метеоролог Гүзәлия Сәхбиева. Мөслим синоптикла­ры тәүлек дәвамында һава торышында­гы үзгәрешләрне күзәтеп, аларны калын дәфтәрләргә терки, алдагы еллар белән чагыштыра.

– Һава торышы турындагы мәгълүматлар “һава”дан алынмый. Без атмосфера басымы, болытлар торышы, җил юнәлеше, һава дымлылыгы, тем­пература турындагы мәгълүматларны тиешле инстанциягә җибәргәч кенә, синоптиклар алдагы көннәргә фараз төзи ала, – ди район метеостанциясе хезмәткәрләре.

Район метеостанциясе һава торышы турындагы мәгълүматларны “5ру” сыл­тамасы белән урнаштыра. Әлеге сылтама белән керүчеләр һава торышы турында төгәл мәгълүмат ала.

– Метеостанциядә һава темпера­турасын һәм дымлылыгын, җилнең юнәлешен һәм тизлеген, явым-төшем күләмен үлчәүче датчиклар урнашты­рылган автоматик метеорологик ком­плекс эшли. Метеостанциядә җирлектә радиация дәрәҗәсе дә үлчәнә, атмосфе­радагы радиоактив матдәләр билгеләнә. Барлык күзәтүләрне, мәгълүматларны республиканың Гидрометеороло­гия һәм әйләнә-тирә мохиткә монито­ринг ясау идарәсенә җибәрәбез. Анда, мәгълүматларны карап, мөмкин бул­ган метеорологик шартлар турында кисәтәләр, – ди Нәзилә Сибаева.

Март – яз ае. Әмма кыш китәргә ашыкмый. Кары да ява, бураннары, җилләре дә булып тора. Мартның бе­ренче ике ункөнлекләрендә явым-төшем күләме нибары 3 миллиметр булган. Бу – нормадан 50 процентка ким!

Февраль аенда уртача температура -4,2 градус булган. Бу – нормадан 9 граду­ска югары. Явым-төшем күләме дә нор­мадан 60 процентка күбрәк булган. Март аенда уртача һава температурасының нормадан 7 градуска түбәнрәк һәм явым- төшемнең дә нормадан күпкә әз булуы теркәлгән.

Авыл хуҗалыгы һәм азык-төлек идарәсе өчен дә агрометеороло­гик күзәтүләр алып барыла. Авыл хуҗалыгы культураларының үсеше, туфракның дымлылыгы турындагы мәгълүматларны техник-агрометеоро­лог Фагыйлә Минһаҗева туплый.

– Кышын басуларда кар катламының калынлыгы 55 сантиметр иде, бүген ул 36 сантиметр тирәсе. Туң катламының тирәнлеге кыш айларында 70 сантимет­рга җиткән иде, бүген бу күрсәткеч 55 сантиметрны тәшкил итә. Декабрь ба­шында уҗымнар өчен бик уңай шартлар булмаса да, ай азагында тотрыклы кар катламы барлыкка килде һәм уҗымнарга кышлау өчен шартлар уңайлы булды, – ди Илнара Хәмидуллина.

Метеорологлар хәбәр итүенчә, кыш­кы чорда күзәтүләргә аеруча зур игъ­тибар бирелә. Чөнки туфракның туңу тирәнлеге уҗымнарның ничек кыш­лавын күрсәтә. “Коры һава, салкын җил, кырау төшү, һава парлану ке­бек күренешләр күзәтелү начар”, – ди белгечләр.

Быел Бөтендөнья метеорология көне “Иртә кисәтү һәм иртә гамәлләр” тема­сына багышланган. Ул гидрометеороло­гия һәм климат мәгълүматының кеше тормышы өчен әһәмиятен тагын бер мәртәбә ассызыклый.

Лилия Шәймиева