Алмаз Зөлфәтович: 2017 ел тарихка төзелешләр елы буларак кереп калыр
Соңгы өч елда Мөслим районы киң төзелеш мәйданына әверелде дисәк тә ялган булмас. Кайсы гына тармакны алсак та төзү, яңарту эшләре бара. Ә 2017 ел, гомумән, тарихка төзелешләр елы буларак кереп калыр. Әңгәмәдәшебез - район Башкарма комитеты җитәкчесе Алмаз Хамматов та шушы хакта сөйләде.
- Алмаз Зөлфәтович, узып баручы елда төзелеш һәм төзекләндерү эшләренең күп өлеше мәгариф учреждениеләренә туры килде, дип беләбез.
- Чыннан да, мәгариф хезмәткәрләренең республика август конференциясенә әзерлек йөзеннән ел башыннан ук төзекләндерү эшләре башланып китте. Капиталь төзекләндерү программасына кертелгән Мөслимдәге "Ләйсән", "Миләшкәй", Метрәй авылының "Ләйсән" балалар бакчаларында 50 млн сумнан артык төзекләндерү эшләре башкарылды. Район үзәгендәге бакчаларны "Мөслим хуҗалыкара төзелеш оешмасы" җәмгыяте башкарса, Метрәй авылында "Тандем+" җәмгыяте төзүчеләре эшләде. Мәлләтамак авылының "Куянкай" балалар бакчасын капиталь төзекләндерү өчен республика хөкүмәте өстәмә ярдәм бирде. Нәтиҗәдә әлеге бакчада 7,7 млн сумлык ремонт эшләре башкардык. Республика ярдәме белән шулай ук Мөслим гимназиясендә капиталь ремонт үткәрелде, "Нептун" бассейнында төзекләндерү эшләре башкарылды. "Татнефть" акционерлык җәмгыяте ярдәме белән "Укытучылар йорты"нда 6 млн сумлык ремонт үткәрелде. Шулай ук күптармаклы уку-укыту үзәгендә башкарылган реконструкция һәм төзекләндерү эшләре дә һәммәбезнең күз алдында. Заманча технологияләр һәм төзелеш материаллары кулланып төзекләндерелгән мәктәптән тыш эшләр үзәге бинасы да эре шәһәрләрдәге объектлар белән тиңләшерлек булды.
- Быел мәдәният учреждениеләренең кайсыларында төзекләндерү эшләре башкарылды?
- Соңгы берничә елда авыл мәдәният йортларын төзекләндерү буенча күп эшләнде, биш авылда мәдәният йорты төзелде, дистәгә якын авыл клубы һәм мәдәният йортлары ремонтланды. Ә быел "Авыл клубларын төзекләндерү" республика программасына нигезендә Баекта һәм Югары Табында мәдәният учаклары ремонтланды. Аларда барлыгы 13 млн сумлык эш башкарылды. Җирле бюджет хисабына Метрәй авылы мәдәният йортында капиталь лемонт үтте. Хөкүмәтебез биргән финанс ярдәме белән район мәдәният йортына сәхнә җиһазлары алынды һәм сәхнә идәне алыштырылды.
- Алмаз Зөлфәтович, сәламәтлек саклау өлкәсендә узган елларда колачлы ремонт эшләре алып барылган иде. Быел башкарылганнар белән таныштырсагыз иде.
- Әйе, район үзәк хастаханәсендә һәм поликлиникада капиталь төзекләндерү эшләре башкару белән бергә модульле 3 фельдшер-акушерлык пункты төзелгән иде. Быел модульле патологоанатомия бүлеге төзелеше төгәлләнеп килә. Төзү эшләрен "Азнакайнефтемаш" җәмгыяте эшчеләре башкара.
- Быел район "Күп фатирлы йортларны капиталь төзекләндерү" республика программасында катнаштымы?
- Әйе, әлеге программа нигезендә районда берничә ел дәвамында күпсанлы йортлар ремонтланды. 2017 елда республика ярдәме 2,5 млн сум тәшкил итте. Әлеге суммага "Строймастер-М" җәмгыяте күпфатирлы ике йортта түбә алыштыру эшләре башкарды.
- Җирлегебездә спорт объектлары төзүгә дә зур игътибар бирелә дип беләбез.
- Чыннан да районда спорт мәйданчыклары төзелә яки ремонтлана. Быел Мөслимдә сафка баскан универсал спорт залы чын мәгънәсендә зур төзелеш булды. Республика хөкүмәте ярдәме белән сафка баскан әлеге күркәм бина өчен 199,2 млн сум күләмендә финанс чыгымы тотылды. Шулай ук, Кооператив, Вахитов, Пушкин урамнарында спорт һәм уен мәйданчыклары ясалды, стадион территориясендә хоккей корты булдырылды. Авыл җирлекләрендә дә балалар өчен уен мәйданчыклары урнаштырылды.
- "Чиста су" республика программасы буенча да күләмле эшләр башкарыла. Аларны да барлап үтсәгез иде.
- Халыкны чиста су белән тәэмин итү юнәлешендә һәр елны билгеле күләмдә эш башкарыла. Быел республиканың газлаштыру фонды ярдәме белән Мөслимдәге Яңарыш микрорайонында һәм Урожайная урамында су челтәрләре төзелде. Биологик чистарту корылмасында ләмле мәйданчык булдырылды. Бер уңайдан Яңарыш микрарайонында газлаштыру эшләре дә башлануын да әйтергә кирәк. Бу эш Ф. Садриев, Б. Вәлиев, Тынычлык, Тургай, Шатлык, Таулы, Дуслык урамнарында ТР газлаштыру программасы ярдәме белән башланып китте. Биредә "Линда" җәмгыяте эшчеләре хезмәт куя. Финанс ярдәмен "Газпром трансгаз Казань" җаваплылыгы чикләнгән җәмгыяте күрсәтә.
Моннан тыш урамнарны яктырту максатында Мөслим авылында гына да 2,5 млн. сумлык эш башкарылды. Боларга авыл җирлекләрендә эшләнгәннәрне дә кушсаң, әлеге сумма тагын да артып китә.
- Алмаз Зөлфәтович, төзелеш өлкәсендә киләсе елга нинди эшләр билгеләнгән?
- Киләсе елга да планнарыбыз зурдан. "Социаль ипотека" программасы нигезендә Колхоз урамында 8 квартиралы торак йорт төзү күздә тотыла. Вәрәшбаш һәм Яңа Усы авылы балалар бакчаларында, күпфатирлы йортларда, социаль объектларда төзекләндерү эшләре башкарылачак. Түбән Табын авылында модульле фельдшер-акушерлык пункты, Тат. Бүләр авылында су челтәрен төзү планлаштырыла. Димәк, ел дәвамында һәр өлкәдә диярлек төзү-төзекләндерү эшләре алып барылачак.
Әңгәмәдәш - Фәридә Гайнетдинова.
Следите за самым важным и интересным в Telegram-каналеТатмедиа
Безнең телеграм каналга кушылыгыз! Телеграм-канал
Нет комментариев