Тегүче Гөлия

Беренчел кирәк-яраклар арасында эчке киемнәргә дә ихтыяҗ зурдан. Райондашыбыз Гөлия Хәйретдинова да ярдәмгә саллы өлешен кертә.

Гөлия апа гомер буе бухгалтер булып эшләсә дә, сайлаган һөнәре буенча ул – тегүче. Балалар өчен өс киемнәре тегүчесе белгечлеген алган кыз бу һөнәрне гомерлек юлдашы итә.

– Тегү эшен яшь чактан ук үз итәм. Мәктәптә укыганда матур күлмәкләр, итәкләр тегеп кия идем. 10 сыйныфны тәмамлагач, укуымны Казандагы тегүчеләр әзерләүче училищеда дәвам иттем. Район көнкүреш хезмәте күрсәтү комбинаты юлламасы нигезендә укыгач, туган ягыма эшкә кайттым. Рус Шуган авылында әлеге комбинатның кабул итү пункты бар иде, хезмәт юлым шунда башланды, – дип сөйләде Гөлия Хәйретдинова.

Үзенә беренче күлмәкне 7 сыйныфта укыганда тегеп кия ул. Бүген махсус хәрби операциядәге егетләргә эчке киемнәр тегү белән мәшгуль. Яшендәй тизлек белән тегә бара, киемнәрне билгеле бер тәртиптә төреп озата бара. Тормыш иптәше Илгизәр абый һәрвакыт хәләле янәшәсендә. “Тормыш иптәшем итеп Гөлиямне сайлаганга бүген дә сөенеп туя алмыйм”, – ди хуҗа.

Тулырак «Авыл утлары» газетасының 2025 ел өчен 14 март саныннан укыгыз.

Лилия Шәймиева фотосы