Яшь җырчы Айбулат Гыйләҗетдинов: «Татар һәм башкорт телләрен халыкка танытасым килә»
Айбулат Гыйләҗетдинов – Башкортостан һәм Татарстан тамашачысының йөрәген яулап алырга өлгергән яшь «йолдыз».
Айбулат Гыйләҗетдинов – Башкортостан һәм Татарстан тамашачысының йөрәген яулап алырга өлгергән яшь «йолдыз». Сәхнәдә тәүге адымнарын ясый гына башлаган Айбулат ноябрьда узачак концертларына әзерләнгән арада «Интертат»ка интервью бирергә дә вакыт тапты.
– Айбулат, син тумышың белән кайсы яклардан?
– Мин – Башкортстан егете, Илеш районыннан булам.
– Сиңа 21 яшь кенә, һәм син әле үк концертларыңа тулы заллар җыясың, моның сере нидә?
– Моның сере юк. Мин үз иҗатым белән яшим, тормыш турында моңлы җырлар башкарам.
– Җырларың бер-бер артлы чыгып тора, бу финанс яктан авыр түгелме?
– Дөресен генә әйткәндә, җырлар чыгару зур чыгымнар таләп итә. Беренче адымнарым гына булгач, бигрәк тә авыр. Финанс яктан миңа әти-әнием бик нык булыша, аларга зур рәхмәт. Алла боерса, бу чыгарган акчаларны концертлар белән кайтарып булыр дип өметләнәм.
– Бер җырны чыгару өчен якынча ничә сум акча кирәк?
– Бу сорауга җавап та биреп булмый, чөнки һәр җыр үзенчәлекле, һәм аларның бәяләре дә төрле.
– Репертуарыңда барлыгы ничә җыр бар?
– Бүгенге көндә минем репертуарымда 25 җыр бар. Шулай ук без яңа җырлар өстендә эшлибез, аларны минем концертларда ишетеп булачак , ә музыкаль мәйданнарга исә алар соңрак чыгачак.
– Җырларыңның авторы үзеңме?
– Үземнең бер җырым бар – «Әнкәй хаты» , ә болай мин Ривал Хисмәтуллин, Ирек Габдрахманов, Альфред Якшимбетов җырларын яратып башкарам.
– Кайсы җырларны башкаруың сине халыкка танытты?
– Мине халыкка «Әнием» ретро җыры һәм Ирек Габдрахмановның «Елап калма» дигән яңа җыры танытты.
– Ничә яшьтә җырлый башладың?
– 7 яшьтә. Авылда яшәгәч, анда әллә ни мөмкинлекләр дә юк иде. Шуңа мине әти атнасына 3 тапкыр район үзәгенә алып бара иде.
– Нинди җырларга клибың бар? Клип төшерү шулай ук кыйммәтледер?
– Хәзерге көндә минем «Тәүге мәхәббәт», «Елап калма», «Әнием», «Син», Бәхет», «Әнкәй хаты» җырларына клипларым бар. Әйе шул, клип төшерү дә кыйммәткәрәк төшә, югарыда әйтелгәнчә, клип төшерүләргә дә бәяләр төрле.
Фото: Айбулат Гыйләҗетдиновның шәхси архивыннан
Нет комментариев