Сөйләм дефектларының сәбәбе – аралашу җитмәүдә

Логопедка мөрәҗәгать итүчеләрнең күбесе – әти-әниләр. Кемнеңдер баласы кайбер авазларны әйтә алмый, икенче берәүнеке тотлыга, өченчеләрнең сабые бөтенләй сөйләшми.

Флера Харрасова 35 елдан артык дефектолог-логопед, балалар психологы булып эшли. Аңа күрше-тирә районнардан да мөрәҗәгать итүчеләр күп.

– Сөйләм – катлаулы процесс. Сөйләмдә җитешсезлекләр бар икән, алар үзеннән-үзе юкка чыкмый. Бу кимчелекләр баланың тирә-юньне тануына комачаулый, акыл үсешен тоткарлый. Белгечкә мөрәҗәгать итмичә, кимчелекләрдән котылып булмый. Логопед авазны аерым һәм иҗекләрдә, сүзләрдә, җөмләләрдә, текстта ныгыта, – ди Флера Харрасова.

Флера апа билгеләп үткәнчә, кешенең сөйләме, авазларны дөрес итеп әйтүе кечкенәдән формалаша. Кайбер балаларның теле соң ачыла, ә кайсы дөрес итеп җөмлә төзи алмый. Кайбер балалар сүзләрне кабатлап әйтә алмаска мөмкин.

Тулырак «Авыл утлары» газетасының 2024 ел өчен 8 ноябрь саныннан укыгыз.

Лилия Шәймиева фотосы