Өч ай эчендә районның ДАИ хезмәткәрләре спиртлы эчемлекләр эчеп транспорт белән идарә иткән 10 райондашыбызны тоткарлады

– Алкоголь кулланып рульгә утырсам да, җитди сәбәпләрем бар иде. Башым авыртып интегәм, авыртуны алкоголь гына баса. Бу җинаятьмени? Башым авыртып шартлый бит менә хәзер дә! Соңгы арада күп эчелде, – диде Хафизов, спиртлы эчемлекләр куллануын яшермичә.

Мировой судья райондашыбызның гаебен дәлилләүче оператив видеосъемканы да күрсәтте. Видеоязмада Хафизовның аек булмавы аермачык күренә иде. Сөйләшүе дә, аягында көчкә басып торуы да аның алкогольле эчемлекләрне күп кулланганлыгын раслый. Видеоязмадан тыш ДАИ инспекторының алкотестер ярдәмендә тикшерү үткәрүе, соңрак район хастаханәсенең ашыгыч ярдәм бүлегендә узган тикшерү дә судта дәлил буларак китерелде. Тикшерү нәтиҗәләре райондашыбызның канында спирт күләменең нормадан биш мәртәбә (!) күбрәк булуын күрсәткән.

Фото – «Мөслим-информ» архивыннан