2 август – Һава десанты гаскәрләре көне

Үзләренең хәрби хезмәтен илебез иминлеген саклауга багышлаган кыю егетләребезне бәйрәм белән район Башкарма комитеты җитәкчесе Ирек Салихҗанов тәбрик итте.

-Сезгә, якыннарыгызга һәм гаиләләрегезгә ныклы сәламәтлек, күңел күтәренкелеге, эшегездә һәм тормышыгызда зур уңышлар телибез. Бәйрәмнәрегезне һәрвакыт аяз, имин күк йөзе астында каршыларга язсын! - диде Ирек Фаязович.

Бәйрәм уңаеннан Германиядә хезмәт иткән десантчы Риназ Гәрәевка "Һава десанты гаскәрләренә - 95 ел" медале тапшырылды.

1233 һәм 328 нче полк командирларыннан Мөслимдәге десантчылар берләшмәсенә, МХО зонасындагы егетләргә ярдәм иткән өчен, Рәхмәт хатлары бирелде. Әлеге полкларда бүген Мөслим егетләре- десантчылар хезмәт итә. Мондый төр хатлар, истәлекле язулар һәм Мактау грамоталары Михайловка авылында  десантчы Алексей Чубаров йортында эшләнгән бүлмә-музейда саклана.

Чара район үзешчәннәренең дәртле җырлары белән үрелеп барды. Бәйрәм ахырында мемориалдагы һәйкәлләргә чәчәкләр салынды.

Лилия Шәймиева репортажы.