Яшьләр урамыннан йөрү тыелмый

Райондашларыбыз редакциягә үзләрен борчыган мәсьәләләр, сораулар белән мөрәҗәгать итә. Бер райондашыбыз йөк машиналарының нигә район үзәгендә йөрүе белән кызыксынды.

– Катмыш ягыннан килгән фуралар, “Ләззәт” кибетеннән соң борылып, Яшьләр урамына кереп китә. Зур йөк машиналарына Мөслим авылы урамнары буйлап йөрү рөхсәт ителәме? – ди ул.

Әлеге мәсьәләгә ЮХИДИ Мөслим бүлеге җитәкчесе Феликс Мәгъданов ачыклык кертте:

– Йөк машиналарына Мөслим авылының Яшьләр урамына борылырга рөхсәт ителә, анда “йөк машиналарына йөрү тыела” дигән билге юк. Яшьләр урамы аша машиналар Әлмәт, Азнакай шәһәрләренә яки күпер аша чыгып Актаныш районына китә. Ә Кооператив урамыннан йөрү рөхсәт ителми.

Фото – Мөслим-информ архивыннан