Гафаров: Татарстанда юл-транспорт һәлакәтләрендә үлүчеләр саны икенче ел рәттән арта

Татарстанда икенче ел рәттән юл-транспорт һәлакәтләрендә үлүчеләр саны арту тенденциясе саклана. Бу хакта бүген ТР Министрлар Кабинетында ЮХИДИ комиссиясе утырышында Татарстан Республикасы Премьер-министры урынбасары Шамил Гафаров хәбәр итте.

«Ун ел буе юлларда үлүчеләр санын киметә идек. Соңгы ике елда нәрсә булды?» – дип билгеләп үтте ул.

Шамил Гафаров ассызыклаганча, быел юллардагы хәлләр канәгатьләнерлек түгел. Төп сәбәп итеп ул ведомстволарның эшне җитәрлек алып бармавын атады.

«Без ун ел буе юлларда үлүчеләр санын киметүгә ирештек. Ни өчен соңгы ике елда моны булдыра алмыйбыз? Бюджет акчалары һәм финанс ресурслары җитми дип әйтеп булмый. Акча ягыннан – тәэмин ителгәнбез. Ләкин оештырылган эш җитми», – дип өстәде ТР Премьер-министры урынбасары.

Чыганак: Татар-информ