Ярдәмгә мохтаҗлар – дәүләт яклавында

ТР Хезмәт, халыкны эш белән тәэмин итү һәм социаль яклау министрлыгына караучы учреждениеләрнең йомгаклау җыелышы үтте. Анда узган елга нәтиҗәләр ясалды, киләсе елга бурыч-максатлар билгеләнде. Җыелышта Башкарма комитет җитәкчесенең социаль-мәдәни мәсьәләләр буенча урынбасары Марина Бәдретдинова катнашты.

Райондагы социаль яклау бүлегенә караган биш оешмада 108 кеше эшли.

– Узган ел социаль яклау бүлеге тарафыннан гражданнарга 62 миллион сумнан артык акчалата ярдәм күрсәтелде. Шуның 9 миллионнан артыгы социаль контракт нигезендә аз керемле гражданнарга түләнде. Эш урыны булмаган 31 кеше белән социаль контракт төзелде. Шәхси хуҗалыкларның эшен җәелдерү буенча – дүрт, шәхси эшмәкәрлек һәм үзмәшгульлекне үстерү өчен 22 социаль контракт төзелде. Быел да бу программа дәвам итә, – диде район социаль яклау бүлеге житәкчесе Гөлнар Фәтхуллина.

22 пенсионер республика шифаханәләренә ташламалы юлламалар белән тәэмин ителгән. “Республиканың дәүләт учреждениеләре, муниципаль оешмаларда (социаль яклау, спорт, мәдәният, медицина, мәгариф бүлекләренә караган оешмалар) хезмәт куючы 52 хезмәткәргә шифаханәдә дәвалану өчен 25әр мең сумлык сертификат бирелгән. Бу эш пилот проекты кысаларында башкарылган. Сертификатларның гомуми суммасы 1 миллион 300 мең сум тәшкил иткән. Бу проектны быел да дәвам итәргә уйлыйлар.

“Демография” милли проектын гамәлгә ашыру кысаларында авыл җирлегендә яшәп, 25 яшь тулганчы беренче баласын алып кайткан 25 әни – 50 мең сум, 29 яшь тулганчы өченче һәм аннан соңгы баласын алып кайткан сигез әни 100әр мең сум акчалата ярдәм алган. Балалары туган аз керемле унике гаиләгә бала кирәк-яраклары комплекты алу өчен белешмә бирелгән. 3 яшькә кадәрге баласы булган аз керемле 34 гаиләгә дару алу өчен 10 мең сум акча күчерелгән.

Тулырак «Авыл утлары» газетасының 2025 ел өчен 7 февраль саныннан укыгыз.

Фәридә Гайнетдинова фотолары