Әзерлек бара

Әле басу-кырларда ап-ак кар ята. Һава торышы да үзенең суыклары белән, тиз генә язга урын бирергә җыенмавын белдерә. Әмма аграрийлар инде бүгеннән үк язгы кыр эшләренә әзерлек алып бара. Безнең өчен бик еракта тоелган язгы чәчү кампаниясе авыл хуҗалыгы тармагында эшләүчеләр өчен инде бусагада басып тора.

Авыл хуҗалыгы формированиеләре язгы кыр эшләренә әзерлекне узган елдан – көзге кыр эшләре төгәлләнү белән үк башлаганнар иде. Техниканы тиешле таләпләргә туры китереп кышкы саклауга кую, барлык тракторлар, җир эшкәртү һәм чәчү комплексларын төзекләндерү, аларны карап-тикшереп чыгу кебек эшләр белән механизаторлар кыш буе шөгыльләнделәр. Бүген инде алар барлык төр техниканы, коралларны тулы әзерлек сызыгына куялар.

Район авыл хуҗалыгы һәм азык-төлек идарәсе җитәкчесе Ренат Вәлиев бу хакта түбәндәгеләрне җиткерде:

– Быелгы язгы кыр эшләре кампаниясе чорында 58 мең 454 гектар мәйданда язгы чәчү эшләре башкарылачак. Тракторларны, җир эшкәртү һәм чәчү комплексларын тулы әзерлек сызыгына кую мөһим. Язның бер көне ел туйдыра, дип халкыбыз юкка гына әйтмәгән. Кыр эшләре чорында һәр минут, һәр сәгать кадерле. Бүгенге көндә районда 200дән артык трактор исәпләнә. Алар арасында Россиядә җитештерелгәннәре дә, чит илләрнеке дә бар. Бүген язгы кыр эшләрендә катнашачак барлык тракторлар, 40ка якын чәчү комплексы тулысынча әзер. Запас частьлар белән тоткарлыклар юк, хәтта кирәкле булырга мөмкин запас частьлар да инде бүгеннән үк агрофирмаларга кайтарып куелган.

Тулырак «Авыл утлары» газетасының 2025 ел өчен 7 март саныннан укыгыз.

Фото – районның авыл хуҗалыгы һәм азык төлек идарәсе архивыннан.