Хезмәт җимеше татлы була

– Бакчада эшләү, төрле яшелчәләр, чәчәкләр, җиләк-җимешләр утыртып, аларны тәрбияләү – иң яраткан шөгыльләремнең берсе. Бу эшкә әнием Рәмиләдән өйрәндем. Кечкенәдән үк ул мине үзе белән бакчага алып чыга иде. Яшелчә үсентеләрен үстереп, туфрак әзер булгач, бакчага күчереп мул уңыш ала иде. Без һәрвакыт үзебезнең ихатада үскән яшелчәне ашадык. Әнием төрле салатлар, кайнатмалар әзерләргә оста булды. Әле бүген дә, олы яшьтә булуына карамастан, яшелчәләр үстерә, кыш буена җитәрлек яшелчәсен дә, кайнатма-салатлар да әзерли, – ди Светлана.

Хуҗиннарның йортларында тәрәзә төбе саен төрле үсентеләр утыртылган тартмалар урын алган, күбесе тишелеп, матур гына үсеп килә. Сибәр өчен су да, яктылык җитмәгәндә кушарга утлары да әзерләп куелган.

– Петуния, сальвия, цинерария тиешелеп чыкты, үсеп киләләр. Гаиләбез белән болгар борычын яратабыз, аннан кышка салатлар да ясыйм. Шуңа ел саен борычның берничә сортын утыртам. Быел “Нежность”, “Восточный базар”, “Желтый апельсин”, “Перец белоснежка”, “Сладкий шоколад” сортларын утырттым. Яшелчәләрнең яңа сортларын үстереп карарга яратам. Моңа кадәр баклажанның “Агат”, “Алмазный”, “Ажур” дигән караңгы көрән сортларын үстердем. Быел “Альбион” һәм “Белый гриб” дигән ак төсле баклажаннар утыртып карадым, үсеп киләләр инде. Ак баклажаннарны теплицада гына үстерәбез. Теплицада туфрак әзер булгач, анда күчерәм, – ди Светлана ханым. 

Светлананың помидорлары да инде берничә сабак чыгарганнар. Күптән түгел тиз өлгерә торган помидор да чәчкән. Ул орлыкларны утыртыр алдыннан марганцовкалы суга салып ала, аннан алдан әзерләнгән туфракка төртеп куя. 

– Помидорларның “Бычье сердце”, “Таня”, “Москвичка”, “Желтый налив” сортлары белән бергә минем өчен яңа “Оберег”, “Фиолетовая красавица”, “Мечта Алисы” һәм “Сызранская пипочка” сортларын да утырттым. Помидорларны теплицада да, ачык грунтта да үстерәбез. 200 төптән артып китә алар. Үсентеләренең үсүен күзәтергә яратам, яңа яфрак чыгарган саен сөенәм. Аннан, җимешләре бер-бер артлы кызара, пешә башлагач, теплица белән бакча төрле төсләргә керә. Бу – үзе бер матурлык, сихри дөнья, – ди Светлана Хуҗина.

Үсентеләрне тәрбияләү, корткыч бөҗәкләрдән саклау өчен, тормыш иптәше Мирзаян терлек тиресен ачытып әзерләгән сыеклык һәм “Акварин”, помидорлар өчен “Фертикс люкс” препаратларын куллана.

– Үзең үстергән җимешләр татлы, сыйфатлы һәм тәмле дә була. Шул ук вакытта аларны үстерү, уңыш алу өчен бик күп хезмәт куярга кирәк. Мирзаян – иң зур ярдәмчем. Теплицабыз җылытыла, суы һәм уты бар. Ирем миңа бөтен уңайлыкларны тудыра. Үсентеләрне күчергәннән алып, җимешләрен җыйганчыга кадәр бакчадан кермибез. Күпвакыт су сибү, чүп утау да аңа кала. Кибеттә эшләгәч, иртән китәм, кич кайтам. Улыбыз, кызыбыз да яшелчәләрне тәрбияләргә ярдәм итәләр, – ди бакчачы.

Иртә яздан башлап, кар яуганчы Хуҗиннарның бакчасында төрле чәчәкләр үсә. 

– Чәчәкләрне балачактан ук бик яратам, шуңа күпләп утыртам. Петунияне бакчадан алып кереп, үз савытында калдырам да, язга чыккач, “Корневин” белән үрчетәм. Үземнән арткан үсентеләрне әниемә, туганнарыма, дусларыма да бирәм. Ихатада, бакчада дистәләгән чәчәкләр үсә. Мультифроларны да кышка өйгә кертәм, алар алты төрле, уянып киләләр инде. Җәй көне чәчәкләрем белән сөйләшеп йөрергә, аларның хуш исен иснәргә яратам. Кайчак Мирзаян: “Кем белән сөйләшәсең иртә таңнан?” – дип артымнан килеп җитә. Аннан икәү үзебез үстергән чәчәкләргә сокланып, аларның матурлыгына таң калып бер тын басып торабыз. Безгә килгән һәркемне шушы матурлык каршы алсын, йортыбызга һәрвакыт матурлык һәм бәрәкәт өстәп торсын, дип утыртам чәчәкләрне, – ди Светлана ханым.

Кешенең күңел матурлыгын ул үстергән гөлләр, чәчәкләр сөйли. Тырыш бакчачы гына түгел, ә үрнәк гаилә дә булган Светлана һәм Мирзаян Хуҗиннарның бакчасы, хуҗаларының тырыш, хезмәт сөюче икәнлеген дәлилләп, ел саен мул уңыш бирә, берсен-берсе матур чәчәкләре белән сөендерә.

Фото – Светлана Хуҗинаның шәхси архивыннан.