Сарымсак кына димәгез...

Барлык тиешле кагыйдәләрне үтәп, әлеге яраткан яшелчәләрдән мул уңыш алуның гади кагыйдәләре турында Россия авыл хуҗалыгы үзәгенең Татарстан филиалы белгечләре белән сөйләштек.

САРЫМСАКНЫ НИЧЕК УТЫРТЫРГА?

Яхшы уңыш алу өчен, сарымсак утыртуның төп үзенчәлекләрен барлап үтик. Сарымсак уңдырышлы җирне ярата, комлы туфракта да яхшы үсә. Туфракның әчелеге 6-7 pH күрсәткеченә туры килергә тиеш.

Түтәлләрне, җирне 25 сантиметр тирәнлеккә кадәр казып, сарымсак утыртканчы 1-1,5 атна алдан әзерләргә кирәк. Шуңа 1 кв. метрга 5-6 килограмм черемә, 30 грамм суперфосфат һәм 20 грамм калий тозы кертелә.

Безнең җирлектә сарымсак, туфрак температурасы 5 сантиметр тирәнлектә +12 градуска кадәр төшкәч, сентябрь-октябрь айларында утыртыла. Сарымсакны утырту алдыннан гына бүлбеләргә аерырга кирәк. Утыртканда, эре бүлбеләрне һәм уртача зурлыктагы бүлбеләрне файдаланырга киңәш ителә.

Утыртырга 12 сәгать кала сарымсакны сыек марганцовка эретмәсендә яки 1%лы бакыр купоросы эретмәсендә тотарга кирәк. Бу сарымсакның тышкы ягын инфекцияләрдән зарарсызландыру өчен эшләнә.

Түтәлләр әзерләгәндә, моңа кадәр биредә нинди культуралар үсүен дә исәпкә алырга кирәк. Кабак, кәбестә, кузаклы, яшел культуралар үскән җир әйбәт була. Сарымсакны элеккеге урынына дүрт-биш елдан соң кайтарырга мөмкин.

Сарымсак утыртканда төп кагыйдә – бүлбеләрне җиргә батырмагыз, бу тамыр үсешен тоткарлаячак. Тыгызланган җир соңыннан сарымсакны җир өстенә этеп чыгарырга мөмкин һәм ул туңачак. Шуңа күрә буразналарга утырту яхшырак. Буразналарда туфрак артык йомшак булырга тиеш түгел, аны бераз тыгызларга кирәк. Югыйсә бүлбеләр “батарга” мөмкин, ул чакта сарымсак вак була һәм начар саклана. Утырту тирәнлеге туфракның тибына һәм сарымсак бүлбеләренең зурлыгына бәйле. Бүлбенең өстеннән туфрак өслегенә кадәр 3-4 сантиметр калырга тиеш. Өстен 2-5 сантиметр калынлыктагы торф катламы, черемә яки пычкы чүбе мүлчәсе белән капларга, түтәлләрдә карны тоту өчен чыбык-чабык салырга кирәк.

Фото – ясалма фәһем белән эшләнде