Моңлы Мөслим

Мәктәпнең беренче директоры – Ана­толий Калашников. Ул биредә ике ел җитәкчелек итә, фортепиано классында укыта. Танылган баян­чы, Татарстанның атказанган мәдәният хезмәткәре Харис Нигъмәтҗанов – сәнгать мәктәбенә нигез салучыларның берсе.
Музыка мәктәбе ачылу турындагы яңалык мөслимлеләр күңеленә хуш килә. Мәктәпкә язылырга теләүчеләрне бина сыйдырып бетерә алмый. Акрын­лап уку бүлмәләре икедән бишкә кадәр арта. Форте­пиано белән баянда уйнарга өйрәтүдән тыш, балалар­ны балалайка, думбра, мандолина һәм гитарада уй­нарга өйрәтәләр. Соңрак тынлы уен кораллары клас­сы да ачыла.
Төрле елларда авылларда музыка мәктәбенең филиаллары ачыла. Мәсәлән, алар Михайловка, Мәлләтамак, Иске Карамалы, Түбән Табын, Тат. Бүләр авылларында уңышлы гына эшли.

1978 елда район үзәгенең Пушкин урамында ике кат­лы музыка мәктәбе бинасы салына (хәзер туган як му­зее, рәсемдә). 1985-1986 елларда сәнгать мәктәбендә художество-графика бүлеге ачыла. 1986 елда мәктәптә “Мөслим тугайлары” фольклор ансамбле оеша. 1990 елда – хореография, 2003 елда театр бүлеге эшли башлый.

2009 елда сәнгать мәктәбе яңа микрорайонда­гы зур яңа бинага күчә. Узган ел Мөслимдә балалар сәнгать мәктәбенә нигез салынуга 50 ел тулды. Юби­леена мәктәп үз тарихын чагылдырган китап та чы­гарды.

Язмада туган якны өйрәнү музее хезмәткәрләре әзерләгән материаллар файдаланылды.

Фото -  "Туган як" музее архивыннан