Авыл хуҗалыклары язгы кыр эшләренә әзер

Район авыл хуҗалыгы һәм азык-төлек идарәсе җитәкчесе Ренат Вәлиев:

– Быелгы язгы кыр эшләре кампаниясе чорында 58 мең 454 гектар мәйданда язгы чәчү эшләре башкарылачак. Тракторларны, җир эшкәртү һәм чәчү комплексларын тулы әзерлек сызыгына кую мөһим. Язның бер көне ел туйдыра, дип халкыбыз юкка гына әйтмәгән. Кыр эшләре чорында һәр минут, һәр сәгать кадерле. Бүгенге көндә районда 200дән артык трактор исәпләнә. Алар арасында Россиядә җитештерелгәннәре дә, чит илләрнеке дә бар. Бүген язгы кыр эшләрендә катнашачак барлык тракторлар, 40ка якын чәчү комплексы тулысынча әзер. Запас частьлар белән тоткарлыклар юк, хәтта кирәкле булырга мөмкин запас частьлар да инде бүгеннән үк агрофирмаларга кайтарып куелган.

Фото - район хакимиятенең матбугат хезмәте архивыннан.