Хезмәт хакын исәпләүнең яңа кагыйдәләре кайберәүләрнең отпуск түләүләрен арттырды

Уртача хезмәт хакын исәпләү кагыйдәләре үзгәргәннән соң, россиялеләрнең бер өлешенә отпуск түләүләре арткан. Бу хакта ТАССка Дәүләт Думасының Хезмәт, социаль сәясәт һәм ветераннар эшләре комитеты башлыгы Ярослав Нилов хәбәр итте.

Аның сүзләренчә, 2025 елның 1 сентябреннән Россиядә уртача хезмәт хакын исәпләүнең яңа тәртибе гамәлдә.

«Уртача хезмәт хакын исәпләгәндә хәзер гражданның өстәмә керемнәре дә исәпкә алына. Әгәр конкрет хезмәткәрнең уртача хезмәт хакы арткан икән, бу аның отпуск чоры өчен түләүләренә дә уңай йогынты ясады», – дип аңлатты депутат.

Шул ук вакытта ул ассызыклаганча, түләүләр арту барлык хезмәткәрләргә дә кагылмады, ә нигездә эш бирүчедән өстәмә түләүләр алучыларга гына.

РФ Хезмәт кодексы буенча еллык түләүле отпуск 28 календарь көн тәшкил итә. Отпуск түләүләре окладны, өстәмә түләүләрне һәм премияләрне дә кертеп, 12 айлык уртача керемнән чыгып исәпләнә.

Тулырак: https://tatar-inform.tatar/news/xezmat-xakyn-isaplaunen-yana-kagyidalare-kaiberaularnen-otpusk-tulaularen-arttyrdy-5925332

Фото: © «Татар-информ», Владимир Васильев